أكّد الدكتور عمرو الورداني، أمين الفتوى بدار الإفتاء المصرية، أن يوم عرفة هو يوم العمل الصالح بامتياز، مشيرًا إلى أن هناك أورادًا يغفل عنها كثيرون، لكنها عظيمة الأثر في ميزان الله، وعلى رأسها "ورد الخدمة" و"ورد جبر الخواطر".
وقال أمين الفتوى بدار الإفتاء المصرية، خلال حلقة برنامج "مع الناس"، المذاع على قناة الناس، اليوم الأربعاء: "من الساعة 11 صباحًا حتى الساعة 12 ونص أو قبل الظهر بشوية، ده وقت مهم جدًا نخصصه لـ ورد اسمه ورد الخدمة. وده معناه إنك تدور على حد تخدمه، ولو ملقتش برّه.. أهل بيتك أولى بالخدمة.. ممكن تساعد في تنظيف البيت، تقف مع زوجتك أو والدتك، أو تخدم أي حد في بيتك محتاجك".
وأضاف: "لو خرجت من البيت، شوف محتاج في الطريق، أو روح دار مسنين أو بيت أيتام قريب منك.. يوم عرفة ده يوم الجمع، يوم الحج الأكبر، ويا سلام لو كان عندك فرصة لعمل تطوعي. أنت كده مش بس بتخدم، ده كأنك واقف في خدمة الدين والخلق والمجتمع كله".
وتابع: "بعد صلاة الظهر لحد الساعة 2 أو 2:30، نيجي للورد الأعظم في هذا الوقت.. اسمه ورد جبر الخواطر، وده عبادة جليلة بيحبها ربنا سبحانه وتعالى.. زي ما ربنا بيجبر خاطر الحُجاج في يوم عرفة، هو كمان بيحب اللي بيجبر خواطر عباده".
واقترح الدكتور الورداني أن نجبر خواطر 9 أو 10 أشخاص في هذا التوقيت، قائلًا: "اتصل بحد كان مكسور، وادعِ له.. ابعت رسالة لحد حاسس إنه وحيد.. شكرًا بسيط لحد عمل لك حاجة زمان.. زيارة أو مكالمة لحد مريض.. دعوة من القلب لحد بعيد.. كل ده من جبر الخواطر، وكل ده نور في يوم عرفة".
وتابع: "لو عملت ورد الخدمة، وورد جبر الخواطر، هتحس إنك بتعيش يوم عرفة مش بس بالعبادة.. لكن كمان بالرحمة، والحنان، ومشاركة الناس في أحزانهم وأفراحهم.. ودي العبادة اللي ربنا بيحبها أكتر من أي حاجة"
إخلاء مسؤولية إن موقع عاجل نيوز يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
