كان فاكرها صفقة العمر... دفع ملايين عشان يستلم وحدتين في مول فخم في الدقي. لكن اللي حصل بعد كده؟ قصة نصب متقنة، بطلها شركة مقاولات شهيرة، وضحيتها نجم كروي كبير... الكلام هنا عن الصقر أحمد حسن، قائد منتخب مصر السابق! تعالوا نعرف إيه الحكاية بالظبط.
الحكاية بدأت إزاي؟
الحكاية بدأت لما الكابتن أحمد حسن راح قسم شرطة الرمل أول في الإسكندرية وعمل محضر رسمي. البلاغ كان ضد شخصية كبيرة: ج.م.ف، رئيس مجلس إدارة شركة مقاولات معروفة.
الشركة دي، حسب كلام أحمد حسن، اتفقت معاه سنة 2017 إنهم يبيعوا له وحدتين تجاريتين في مول المفروض يتبني في منطقة الدقي. كان المفروض يستلم الوحدة الأولى سنة 2022، والتانية سنة 2023.
وقائد منتخب مصر السابق دفع أكتر من 90% من تمن الوحدتين، يعني أكتر من 5 مليون جنيه! دفع الفلوس دي كلها على أمل إنه يستلم في المواعيد المتفق عليها.. لكن... الصدمة كانت كبيرة!
اللي حصل كان العكس تمامًا! أحمد حسن بيقول إنه بعد كل ده، اتفاجئ إن الأرض اللي المفروض يتبني عليها المشروع لسه زي ما هي! لا مول اتبنى، ولا حتى حفر ابتدوا فيه. الشركة ماعملتش أي خطوة تبين إنها ناوية تسلّم، ورغم كده فضلت تاخد فلوس من الناس كأن الدنيا ماشية تمام!
ومش بس كده، لما الكابتن أحمد حسن راح يطالبهم بحقه، سواء بفلوسه أو بالوحدات، الشركة بدأت تتهرب. لا بيردوا فلوس، ولا بيسلّموا وحدات، وفضلوا يماطلوا ويتحججوا بأي سبب.
المحامي بتاع أحمد حسن أكد إن الشركة دي عليها مديونيات ومخالفات وصلت لـ 306 مليون جنيه! يعني مش بس ما نفذتش وعودها، دي كمان غرقانة في مشاكل مالية ضخمة.
ولما حاولوا يبرروا الموقف، قالوا له أصل فيه "ظروف قهرية" حصلت بعد قرارات وقف البناء اللي الدولة أخدتها.
في الآخر، أحمد حسن ماسكتش، وعمل محضر رسمي ورفع القضية.. والقضية لسه شغالة لحد دلوقتي في المحاكم.
بس السؤال المهم واللى لازم ناخد بالنا منه : لو نجم بحجم أحمد حسن اتنصب عليه بالطريقة دي... يبقى المواطن العادي مصيره إيه؟.
في النهاية، الرسالة اللي عايزين نوصلها لحضراتكم من خلال الحلقات دي هي: استثمر فلوسك في جهات موثوق فيها.. اشتري أذون الخزانة، أو شهادات الاستثمار من البنوك، أو استثمر في مجال الذهب. كل دي مجالات للاستثمار الرسمي اللي بيخضع لإشراف الأجهزة المختصة، واللي بتبقى فلوسك فيها في أمان.
وحابين نفكركم إن في "سلسلة التحايل المالي في الرياضة"... لسه فيه حكايات أكبر، وشبكات أعقد، وفلوس بتتبخر في الهوا قدام عينينا أبطالها كانوا نجوم في الملاعب... استنونا في الحلقة الجاية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
