ايه اللي حصل في العالم الساعات اللي فاتت.. وليه الدهب داخل على عاصفة قوية.. والاسعار هتوصل كام في السوق العالمية.. وايه مصير الدهب بعد العيد في مصر ..
لو نمت بدري امبارح فإكيد صحيت وعرفت أن العالم كان مقلوب بالليل ا بعد هجوم أوكراني نوعي على أهداف وقواعد روسية خلف خساير صخمة اقتصاديا ودا غير إن الهجوم فيه إهانة كبيرة وخطيرة للدولة الروسية واللي بتحضر للانتقام كبير.. طيب وبعدين مهي الحرب ليها شهور كتيرة شغالة بينهم.. ايه اللي هيحصل يعني؟
اقول لحضرتك.. اللي حصل امبارح دا تطور خطير جدا في الصراع بين روسيا وأوكرانيا ودا لأن المواجهات اللي كانت بينهم قبل كده مكانش فيها صدى زي اللي حصل امبارح ولاول مرة اوكرانيا تهين الدب الروسي تاني اقوى قوة عسكرية في العالم بعد امريكا ودا بيعتبر تحول كبير في الصراع وهيكون فيه تصعيد خطير.. وطبعا دا هينعكس على الأسواق العالمية كلها وأولها سوق الدهب اللي هو موضوع التقرير بتاعنا... ايه اللي هيحصل في سوق الدهب.
شوف ياسيدي.. زي ما أنت عارف الدهب سوق حساس جدا في الأزمات ووقت الحروب يعني أي توتر في العالم بيكون سبب لارتفاع أسعار الدهب ودا لأنه ملاذ آمن والكل بيجري يشتريه عشان يحافظ على قيمة العملة ويتحوط من اي كوارث مالية.. ولأن الدهب اصلا سعره في العالي بسبب الأزمات السياسية والعسكرية في العالم كله وزاد اكتر بعد فرض ترامب لرسوم جمركية كبيرة على الدول ومواجهته مع الصين.. يعني الدهب هيرجع هيزيد اكتر من أسعاره الحالية اللي هي أصلا بتعتبر أسعار قياسية ومحدش كام متخيل أنها هتوصل كده.
عملية شبكة العنكبوت ودي اسم العملية العسكرية الأوكرانية الأخيرة على روسيا ولعت سوق الدهب في العالم والنهاردة ارتفعت أسعار الدهب العالمية في مستهل تداولات الأسبوع الاثنين وارتفع السعر الفوري بنسبة 0.7% ليصل إلى 3,311 دولار للأوقية وصعدت العقود الآجلة الأمريكية بنسبة 0.6% لتسجل 3,33 دولار مع توقعات باستمرار الصعود في تعاملات النهاردة والايام الجاية مع سير الأحداث في روسيا وحسب وتيرة الأزمة بين الولايات المتحدة والصين من ناحية وبني الولايات المتحدة وأوروبا من ناحية بعد فرض ترامب 50% رسوم على واردات الالومنيوم والصلب وتهديد الاتحاد الأوروبي بالرد على الرسوم.
وبالنسبة لتوقعات الأسعار في سوق الدهب الفترة الجاية فهنلاقي فيه توقعات كتير وكل جهة ليها أسبابها وفيه اللي قال هيوصل 4 آلاف دولار قريب جدا وفيه اللي توقع إنه يوصل 6 آلاف دولار لو استمر العالم في حالة الصراع..
نجيب ساويرس واللي ليه استثمارات ضخمة في الدهب توقع ارتفاع أسعار المعدن الأصفر خلال الفترة الجاية ووصول سعر الأوقية ث المستوى العالمي إلى 5000 دولار للأونصة خلال سنة أو سنتين ..
اكيد مش محتاج تعرف إن اي زيادة في أسعار الدهب عالميا بتنعكس مباشرة على أسعار الدهب في الصاغة المصرية لانه بالنهاية كل الاسواق مرتبطة بالدولار ومصر بتستورد دهب مشغولات كتير من بره... وخلي الأيام تحكم.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
