يا ترى إيه موضوع سفن التغويز اللي الحكومة بتتكلم عنه؟ وليه فجأة بقينا بنسمع عنها في كل مؤتمر؟ وهل دي فعلا هتحل أزمة الكهرباء في الصيف ولا لأ؟.
في الحقيقة، رئيس الوزراء الدكتور مصطفى مدبولي، طلع في مؤتمر صحفي، وقال إن الحكومة وبالتحديد وزارة البترول قررت تعتمد على حاجة اسمها "سفن التغويز" عشان تضمن إن الكهربا تفضل شغالة في عز الصيف.
ودي مش سفينة واحدة وخلاص، لأ ده الحكومة ناوية تعتمد على أربع سفن تغويز جديدة، بجانب السفينة الوحيدة اللي عندنا من السنة اللي فاتت، يعني هيبقوا 5 سفن شغالة.
طيب إيه هي بقى "سفن التغويز" دي؟
ببساطة كده، السفن دي بتستقبل الغاز الطبيعي وهو في صورته السائلة، وبتحوّله لغاز صالح للاستخدام، سواء في محطات الكهربا أو الصناعة.
العملية دي اسمها "تغويز" يعني بنسخن الغاز المسال ونرجعه لصورته الغازية تاني، بتتعامل معاه كأنه كان نايم في تلاجة تحت 160 درجة، وبنصحيه عشان يرجع يشتغل، والسفن دي مش مجرد وسيلة نقل، دي تعتبر محطات غاز عائمة، بتقوم بالعمليات دي بالكامل في البحر، وده بيخلينا مش محتاجين نبني محطات برية جديدة.
ودي نقطة مهمة جدا في التوقيت الحالي، لأن عندنا ضغط عالي على الشبكة الكهربائية، خصوصا في الصيف، وسفن التغويز دي بتضمن إن عندك غاز دايما يشغل المحطات.
وعلشان الصورة تكون واضحة اكتر، الغاز الطبيعي بيتبعت لنا وهو متجمد ومسال في سفن تبريد ضخمة، ولما يوصل، بيركب على سفينة التغويز، وهناك بيتحول لغاز تاني، ويروح على الشبكة.
طب والتكلفة؟!
سفينة التغويز الواحدة سعرها حوالي 300 مليون دولار لو هتشتريها، لكن الحكومة غالبا بتأجرها، وسعر الإيجار يوصل ل 100 مليون دولار في السنة، ورغم إن الرقم ده كبير، بس لما تقارنه بتكلفة بناء محطة برية ثابتة أو بخسائر انقطاع الكهربا، تلاقيه أوفر وأسرع.
غير كده، النظام ده بيديك مرونة عالية جدا، تقدر تنقل السفن دي من مكان لمكان على حسب احتياجك، ودي ميزة كبيرة في أوقات الأزمات، وكمان، السفن دي بتقلل الاعتماد على البنية التحتية الأرضية اللي ممكن تكون قديمة أو محتاجة صيانة، فإنت بتكسب وقت وكفاءة مع بعض.
وخلينا نقول إن الخطوة دي مش بس علشان الكهربا، دي كمان جزء من خطة أكبر لتأمين مصادر الطاقة وسط ارتفاع أسعار الغاز في العالم، ومشاكل الشحن والتوريد.
لكن طبعا، عشان الخطة دي تنجح، لازم الحكومة تضمن توفر شحنات الغاز في الأساس، لأن التغويز مش هيشتغل لو مفيش شحنة جاية، يعني لازم يكون فيه تنسيق عالي جدا مع الدول الموردة.
وفي النهاية، سفن التغويز هي حل ذكي وسريع ومناسب للأزمة اللي إحنا فيها، بس محتاجة إدارة محكمة وتخطيط مستمر، علشان نفضل منورين وما نرجعش لسيناريو القطع اللي عيشناه قبل كده.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
