فيه ناس سهل توقع في فخ الاحتيال المالي بأشكاله المختلفة زي انك تدي فلوسك لحد مش مضمون عشان يديك فايدة خياليه وبعدين يطلع مستريح ويختفي بشقى عمرك.. أو تدخل في تطبيقات مشبوهة للمراهنات وفلوسك تتبخر.. أو حتى توقع فريسة سهلة لهاكر محترف يستولي على بياناتك وحسابات المالية.. لكن فيه نوع تاني خطير جدا وكتير بيوقع فيه وخاصة الشباب والمراهقين وخطورته أنه بيكون ابتزاز سري يعني الشخص مايقدرش يبلغ عنه أو يتخلص منه وهو الابتزاز أو الاحتيال العاطفي من الجنسين يعني بيوقع فيه الولد والبنت ضحية.
وفكرة الاحتيال العاطفي هي اللعب على المشاعر الإنسانية والدخول في علاقة ويحصل فيها تورط أو فيديوهات وبعدها يبتدي الطرف اللي معاه دليل العلاقة العاطفية في ابتزاز الطرف الآخر بدفع أموال أو الحصول على منافع مالية أو شحن رصيد أو الاستيلاء على حاجات مأدبة زي الدهب مقابل التستر على العلاقة وعدم فضحها للأصدقاء مثلا والأخطر أن قليل جدا اللي بيتجه للوسائل القانونية عشان ياخد حقه لكن الغالية العظمي بتختار السكوت والدفع عشان مايفضحش نفسه.
خطوة النوع ده من الاحتيال المالي أنه مش بيتوقف في مرحلة معينة والطرف الضحية بيستمر في الاستسلام والدفع مقابل عدم الفضيحة وممكن يلجأ للسرقة أو يرتكب جريمة اومعصية عشان يدفع للطرف المحتال أو المبتز.. يعني خراب بيوت من كل ناحية..
الحقيقة اللي لازم تعرفها إن الشخص المحتال دا مش هيبطل يحتال عليك ويبتزك وعشان كده لازم تتجه للإجراءات القانونية وتاخد حقك وتحفظ فلوسك بدل ما توقع في مصيبة أكبر.. وفي نفس الوقت الوقاية خير من العلاج... يعني ماتدخلش في علاقة مشبوهة من الأساس خاصه لو الطرف التاني هو اللي بدأ يرميلك الطعم .
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
