«وعدني بالجواز وهرب».. سيدة تروي مأساتها في محكمة الأسرة لإثبات نسب طفلها

السبت، 31 مايو 2025 10:29 م 5/31/2025 10:29:32 PM

تقدمت «سلمى» (23 سنة) بدعوى إثبات نسب لصغيرها الذي يبلغ من العمر ٥ أشهر، بعدما تنصل والده من الاعتراف به ورفض نسبه اليه على حد قولها في صحيفة دعواها.

سردت سلمى قصتها قائلة: «من سنة ونص، اتعرفت على شاب عن طريق واحدة صاحبتي، كانت بينا خطوبة رسمية، ومعرفتي بيه كانت قدام الناس كلها، في النور، اتقدم لأهلي، وعملنا حفلة، وبدأنا نجهز للجواز»

تابعت: «خلال الخطوبة، العلاقة بيننا كانت قوية، وكان دايمًا يقول لي: (إنتي مراتي قدام ربنا، وجوازنا مسألة وقت) صدقته، وثقت فيه، وسلمته قلبي، وأنا متخيلة إنه خلاص هيبقى جوزي بعد كام شهر، لكن لما عرف إني حامل، اتبدّل، في الأول اتصدم، وبعدها بدأ يتهرب، وبعد كده فسخ الخطوبة من غير سبب واضح، لما حاولت أواجهه، قاللي: «ده مش ابني، روحي اتصرفي، وفعلًا اختفى، وسد كل أبوابه».

أضافت: «فضلت لوحدي، لا قادرة أقول لأهلي الحقيقة، ولا عارفة أواجه الناس، ولا حتى استخرج شهادة ميلاد لابني، لأن خانة الأب فاضية، وأنا اللي كنت فاكرة إني خطيبته، وإن بينا وعود، وموافقة من الأهل، وشهود، كل اللي بطلبه إن ابني يعيش باسمه الحقيقي، مش عايزة فلوس، ولا حتى أشوف وشه، بس مش عايزة ابني يتظلم».