دلوقتي، الناس بدأت تسأل إيه هي أسعار الأضاحي 2025 مع قرب العيد، هنضحي ولا نشتري كندوز وخلاص؟، تعال نقولك الصورة كاملة.
في الساعات الأخيرة، رئيس شعبة القصابين، طلع وقال كلام مهم جدا، الأسعار مش حصل لها زيادة جديدة قبل العيد، بس هي فعلا بقت نار من الأساس، يعني مثلا سعر كيلو اللحمة البلدي بيتراوح دلوقتي ما بين 350 لـ 400 جنيه.
تفتكر ده قليل؟ افتكر معايا إن الكيلو ده كان 170 جنيه بس في آخر 2022، يعني في أقل من 3 سنين، السعر اتضاعف وزيادة، وده اللي خلى ثقافة الشرا والشراكة تتغير خالص، واللي كان بيجيب خروف بقى بيشتري 3 كيلو لحمة وخلاص، أما اللي عايز يضحي بعجل بقى يشترك مع قرايبه أو زمايله، لأن سعر العجل وصل ل 65 ألف جنيه.
" title="كيلو القايم وصل 400 جنيه أسعار أضاحي العيد 2025" frameborder="0">
كمان، الخروف عامل حوالي 9 آلاف جنيه، والماعز في حدود 7 آلاف، يعني لو بتحسبها كده كده، كله داخل على خانة الآلاف.
طب ليه الأسعار وصلت لكده؟
بصراحة، الموضوع له أكتر من سبب، أهمها هو سعر الدولار اللي طالع طيران، وده أثر على تكلفة استيراد الأعلاف، ومش بس كده، زود على ده كمان ارتفاع أسعار الكهربا والمحروقات، وده خلا تكلفة تربية الحيوان في العموم توصل للسما.
يعني بالعربي كده، المربى بقى بيصرف أكتر، والمستهلك بقى يشتري أقل، والمعادلة دي خلت السوق شكله مش مريح لا ليك ولا ليهم.
وفيه مشكلة أكبر، وهي إن مصر دلوقتي بتستورد أكتر من 60% من احتياجاتها من اللحوم من بره، من دول زي الهند والبرازيل والسودان وإسبانيا.
والكارثة إن فيه ناس كتير من صغار المربين خرجوا من السوق، لأن مش قادرين يتحملوا تكاليف التربية، وده خلى الإنتاج المحلي يقل، يعني اللي كان بيعتمد على عجله أو خروفه آخر السنة، بقى مش لاقي نفسه في السوق، وده بيأثر على المعروض والأسعار كمان.
والحل، هو الاهتمام بالثروة الحيوانية، وزراعة الأعلاف في مصر بدل ما نستوردها، ولو ده حصل ممكن الأسعار ترجع تعقل شوية قدام.
وفي النهاية، العيد جاي والناس بتحاول تفرح أهلها وأولادها، بس لازم نحسبها صح، فلو هتضحي حط ميزانيتك وشوف تشترك ولا تاخد بالكيلو.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
