يا ترى ممكن الدهب يوصل لـ4 آلاف دولار للأونصة عالميا؟، طيب الأسعار دلوقتي رايحة على فين؟ وإيه اللي ممكن يخلي سعر المعدن الأصفر يولع كده؟ وأسعار مصر هتكون عاملة إزاي؟
النهاردة، أسعار الذهب في مصر خدت طلعة جديدة، فالجرام عيار 21 زاد 20 جنيه عن امبارح، وبكده بقى سعره حوالي 4635 جنيه.
كمان، عيار 18 بقى بـ 3972 جنيه، وعيار 24 قرب من 5300 جنيه، أما الجنيه الذهب فكسر الـ 37 ألف جنيه، يعني واضح إن السوق مش ناوي يهدى قريب.
طيب إيه اللي بيحصل؟، وليه الناس كلها بتتكلم إن الدهب ممكن يوصل لـ 4000 دولار للأونصة؟
ده مش كلامنا، ده توقع من فرانسيسكو بلانش، رئيس أبحاث السلع في بنك أوف أمريكا، فالراجل بيقولك بكل ثقة إن رغم إن الأسعار نازلة شوية اليومين دول بسبب هدوء التوترات السياسية، بس ده تصحيح مؤقت، وسعر الدهب لسه قدامه طلعة كبيرة في النص التاني من 2025.
يعني ممكن نشوف سعر الأونصة يتخطى 4000 دولار قبل نهاية السنة دي أو بداية 2026، طي السؤال المهم، إيه اللي ممكن يخلي الدهب يوصل للمستوى ده؟
أول حاجة هي أي توتر سياسي أو اقتصادي ممكن يخلي المستثمرين يجروا على الدهب كملاذ آمن، تاني حاجة التضخم العالمي لسه مهدد، والفيدرالي الأمريكي ممكن يخفض الفايدة، وده بيخلي الدهب أكثر جاذبية.
وثالث حاجة هي الطلب على الدهب من البنوك المركزية في العالم بقى كبير جدا الفترة اللي فاتت، وخاصة البنك المركزي الصيني، بس خلي بالك "بلانش" قال برضو إن في المدى القصير، الأسعار ممكن تفضل تتحرك في نطاق محدود، يعني مش لازم نتوقع الطلعة الكبيرة دي دلوقتي حالا، ممكن تحصل على مراحل.
طيب نرجع لمصر، ليه أسعار الدهب عندنا بتتحرك بالشكل ده؟
ببساطة، لأننا بنتأثر بالسعر العالمي، زائد سعر الدولار محليا، وطالما الدولار عندنا بيهدى، ومع تحركات الأسعار العالمية، تلاقي السوق بيتقلب يوم فوق ويوم تحت، بس اللي متأكدين منه، إن الفترة الجاية هتكون مثيرة جدا للدهب، فسواء كنت مستثمر أو بتحوش أو حتى بتتفرج من بعيد، خلي عينك على السوق لأن الدهب ممكن يفاجئ الكل.
ومتوقع إن سعر الجرام الـ 21 يوصل لـ 5 آلاف جنيه وأكتر كمان، عشان كده لازم تراقب السوق كويس.
أما بقى لو لو انت بتشتري الدهب علشان تحوش وتحافظ على قيمة فلوسك على المدى الطويل، فدايما هو الأمان، خاصة في وقت التضخم وعدم استقرار الجنيه، حتى لو سعره طالع دلوقتي، ممكن يطلع أكتر مع الوقت، فلو نيتك التحويش على المدى الطويل، ممكن يكون دلوقتي وقت مناسب.
لكن لو انت داخل تشتري الدهب علشان تضارب أو تبيعه بسرعة وتكسب من فرق السعر، يبقى لازم تبقى واخد بالك، لإن السعر حاليا عالي نسبيا وممكن يصحح وينزل شوية، فـ ممكن تخسر لو اشتريت على قمة.
يعني تعمل إيه؟
لو معاك فلوس زيادة ومش محتاجها قريب، وعايز تحافظ على قيمتها، اشتري شوية دهب، بس بالتدريج، مش مرة واحدة.
أما بقى لو مستني تكسب بسرعة أو شايف إن السعر هيصحح، فاستنى شوية وتابع السوق، وأهم نصيحة هي ما تحطش كل فلوسك في الدهب، وزع بين دهب، شهادة بنكية، شوية سيولة، علشان تبقى دايما في الأمان.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
