هو ليه روسيا حاطة عينها على مصر بكل القوة دي.. هل ممكن التبادل التجاري بين البلدين يزيد بنسبة 30% كاملة في سنة 2025.. وليه فجأة المنطقة الاقتصادية لقناة السويس بقت أهم نقطة في استراتيجية روسيا في الشرق الأوسط وأفريقيا.. وإيه حكاية مشروع الضبعة النووي اللي بيحرك الدنيا كلها.. تعالوا نفهم سوا ليه مصر بقت أهم ورقة في إيد الدب الروسي.. وإيه الخطط الكبيرة اللي بتترسم عشان تحول العلاقات دي لشراكة استراتيجية ضخمة..
الموضوع مش مجرد أرقام وخلاص.. روسيا بتستهدف زيادة التبادل التجاري مع مصر بنسبة 30% في سنة 2025.. الكلام ده قاله إدوارد أخمادولين.. نائب الممثل التجاري الروسي في مصر.. في تصريحات صحفية ليه مؤخرا.. وده معناه إن فيه خطوات جدية هتتعمل عشان يوصلوا للرقم ده..
التبادل التجاري بين البلدين السنة اللي فاتت بس وصل لـ 9 مليار دولار.. وده رقم كبير لوحده.. روسيا عايزة تزود الصادرات والواردات في كذا مجال حيوي أهمهم الحاصلات الزراعية.. مصر بتصدر لروسيا فواكه وخضروات ومنتجات بلاستيكية.. في المقابل.. مصر بتستورد من روسيا الحبوب وعلى رأسها القمح.. روسيا أكبر مورد للقمح لمصر.. والحديد.. والزيوت النباتية والحيوانية.. والوقود.. روسيا كمان لجأت لمصر بداية السنة دي عشان تستورد 150 ألف طن بطاطس.. وده بيبين أهمية مصر كمورد لبعض المنتجات ليها.
كمان فيه سعي كبير من الجانبين لزيادة أعداد السائحين الروس اللي بيجوا مصر.. كمان بيشتغلوا على الترويج لمقاصد سياحية جديدة في مصر داخل روسيا.. وده هيفتح أسواق جديدة للسياحة المصرية..
وخد بالك التعاون في مجال الطاقة بين البلدين قوي جداً.. وده بيبان بشكل واضح في مشروع محطة الضبعة النووية لتوليد الكهرباء.. اللي هو مشروع ضخم ومحوري في علاقات البلدين.
طب ليه روسيا حاطة عينها على مصر كده؟
موسكو شايفة ان مصر بوابة استراتيجية ليها لدول قارة أفريقيا والشرق الأوسط وحوض البحر المتوسط.. الهدف من كده هو زيادة الصادرات الروسية لدول تانية كتير.. وده بيوضح إن روسيا مش بتبص لمصر بس كشريك تجاري مباشر.. لكن كمركز انطلاق لتوسيع نفوذها الاقتصادي في مناطق حيوية كتير.
وخد بالك من حاجة مهمة جدا.. المنطقة الصناعية الروسية في قناة السويس.. هي السر الكبير فى تطوير العلاقات التجارية بين مصر وروسيا.. وهي مربط الفرس.. ونقطة الارتكاز في الاستراتيجية الروسية.. روسيا شغالة بجد على إنشاء منطقة صناعية روسية متكاملة داخل المنطقة الاقتصادية لقناة السويس.. المنطقة دي لو اتنفذت بالكامل.. هتبقى نقلة نوعية في العلاقات الاقتصادية بين البلدين.
طب إيه أهمية المنطقة دي بالنسبة لروسيا؟
المنطقة دي هتساعد الشركات الروسية إنها توطن صناعاتها في مصر.. يعني بدل ما تصدر منتجاتها النهائية من روسيا.. هتصنعها جوه مصر.. وده ليه فوايد كتير زي تقليل تكاليف الشحن والضرائب.. والاستفادة من العمالة المصرية.
وبمجرد ما المنتجات الروسية تتصنع في المنطقة الصناعية في قناة السويس.. هيبقى سهل جداً تصديرها لكل دول أفريقيا والشرق الأوسط والدول المطلة على البحر المتوسط.. كده روسيا هتضرب عصفورين بحجر.. هتنتج بتكلفة أقل.. وتوصل لأسواق جديدة بشكل أسرع وأسهل.
و قناة السويس هي أهم ممر ملاحي في العالم.. وجود منطقة صناعية روسية هناك بيخلي المنتجات الروسية توصل لأسواق عالمية تانية بسهولة.. وبيقوي سلاسل الإمداد الروسية.
اللى لازم تعرفوا ان العلاقات بين مصر وروسيا مش جديدة.. وبتستند على اتفاقية الشراكة الاستراتيجية الشاملة اللي تم توقيعها سنة 2018.. الاتفاقية دي بتشمل كذا محور مهم..إنشاء المنطقة الصناعية الروسية في قناة السويس..وإنشاء محطة الضبعة النووية لتوليد الكهرباء..وكمان التعاون في مجالات الطاقة والأمن الغذائي والتعدين والزراعة والصناعة..والتنسيق المستمر بين البلدين في المحافل الدولية.. وده شامل تجمع بريكس اللي انضمت له مصر مؤخرا.
كل ده بيخلي العلاقة بين مصر وروسيا مش مجرد علاقة تجارية عادية.. لكنها بتتحول لشراكة استراتيجية طويلة الأمد في مختلف المجالات.. وده ليه تأثيرات اقتصادية وجيوسياسية مهمة جداً على المنطقة كلها.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
