مصر عندها خطة لوقف استيراد المواد البترولية من الخارج، وعلشان نوصل للهدف ده الحكومة بتستهدف زيادة انتاجها المحلي.. ياتري اية اللي بتعمله الحكومة علشان توقف استيراد البنزين والسولار والغاز الطبيعي من الخارج.. وامتي هنوصل لصفر استيراد مواد بترولية.
علي مدار السنين اللي فاتت مصر كانت واحدة من الدول الرائدة في تصدير المواد البترولية خصوصا الغاز الطبيعي، واللي مصر كانت بتصدره لحد سنة 2022، وفجأة مصر قررت وقف تصدير الغاز الطبيعي بسبب النقص اللي حصل في الانتاج وزيادة الاستهلاك المحلي، وعلي الرغم من وقف التصدير الا ان الأمور كانت مستقرة لحد سنة 2024، والأمور خرجت عن السيطرة نتيجة الأحمال الكبيرة علي الشبكة القومية للغازات الطبيعية خصوصا في الغاز الطبيعي.
الزيارة الكبيرة اللي حصلت في احتياجات الغاز الطبيعي كانت نتيجه التوسع الحكومي في تحويل عدد كبير من السيارات والمصانع ومحطات توليد الكهرباء، وده اللي خلي الدولة مطالبة بزيادة الانتاج أو فتح الاستيراد، والحكومة اختارت القرار الثاني بفتح الاستيراد لسد النقص المحلي، وعودة تشغيل محطات توليد الكهرباء واللي كانت عدد كبير منهم توقف عن العمل بسبب النقص اللي موجود في الغاز، وده اللي سبب وجود أزمة كبيرة اسمها تخفيف الأحمال واللي استمرت معانا لأكثر من سنة كاملة وكانت الكهرباء بتقطع علي كل المحافظات.
علي مدار الفترة اللي فاتت الحكومة فتحت استيراد المواد البترولية من الخارج ووصلت فاتورة الاستيراد الخارجي لأكثر من من 12.5 مليار دولار في 10 شهور من 2024، وده فاتورة كبيرة جدا علي الحكومة، وعكس التوجيهات اللي اصدرتها القيادة السياسية بوقف نزيف صرف الدولار، وزيادة الانتاج المحلي من المواد البترولية والصناعات .
طيب ازاي الحكومة هتوقف استيراد المواد البترولية من الخارج؟.
وزارة البترول والثروة المعدنية حاليا شغالة علي توقيع 32 اتفاقية التزام بترولية جديدة خلال العام الجاري 2025، ضمن خطط الحكومة لتعظيم إنتاج النفط والغاز الطبيعي، والوزارة بتستهدف حد أدنى للاستثمارات هيتجاوز 1.3 مليار دولار للوصول لمزيد من الاكتشافات وتهيئة برامج الحفر وربط الإنتاج المستهدف على خريطة الإنتاج.
وزارة البترول نجحت في توقيع أكثر من 19 اتفاقية التزام في النصف الأول من 2025 مع عدد من الشركاء الأجانب للتنقيب والبحث عن المواد البترولية، وفي اكثر من 15 اتفاقية جديدة هيتم توقيعها خلال النصف الثاني من العام الجاري .
الشركة القابضة للغازات الطبيعية إيجاس وهيئة البترول المصرية في الوقت الحالي بتستهدفوا حفر أكثر من 100 بئر نفطية وغازية من خلال اتفاقيات الالتزام الجديدة واللي بتنقسم بين حقول نفطية في خليج السويس والصحراء الغربية ومناطق امتياز غازية في المياه العميقة بالبحر المتوسط.
الشركة القابضة للغازات الطبيعية حاليا بتجهيز بيانات مناطق برية وبحرية علشان تطرحها من خلال بوابة مصر للاستكشاف واللي هتكون في الربع الثالث من العام علشان تكون متاحة قدام المستثمرين وشركات النفط والغاز الراغبة في الدخول للسوق المصري .
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
