هو إيه اللي بيخلي مصر حاليا جاذبة للاستثمارات الأجنبية المباشرة؟ وليه شركات عالمية زي أوبو وجي إيه سي بيختاروا مصر عشان يضخوا فيها مليارات الدولارات؟ وإزاي الصين بقت لاعب رئيسي في السوق المصري؟ لو عايز تعرف إزاي مصر بتحقق طفرة استثمارية في 2025.
مصر في السنين الأخيرة بقت وجهة استثمارية مفضلة لشركات عالمية كتير .. مش بس عشان موقعها الجغرافي اللي بيربط آسيا وأفريقيا وأوروبا .. لكن كمان عشان الخطوات اللي خدتها الحكومة عشان تحسن بيئة الأعمال .. ومصر جذبت استثمارات أجنبية مباشرة بقيمة 2.7 مليار دولار في الربع الأول بس .. وده زيادة 15% عن السنة اللي فاتت .. ومش بس كده .. الاقتصاد المصري حقق نمو 3.9% في النص الأول من السنة المالية 2024/2025 .. وده معناه إن السوق عندنا بقى جاهز يستقبل استثمارات أكبر وليه الصين بالذات داخلة بقوة؟
فيه شركات صينية كبيرة عينها على مصر.. شركة أوبو مثلاً قالت إنها عايزة تحول مصانعها في مصر لمركز تصنيع رئيسي بعد الصين نفسها .. وشركة جي إيه سي بتخطط تستثمر 300 مليون دولار في مصر .. والصين كلها أعلنت إنها هتوسع استثماراتها في 2025.
ليه ده بيحصل؟
عشان الصين بقت دولة متقدمة .. تكلفة العمالة عندهم زادت .. فقرروا ينقلوا الصناعات التحويلية زي الإلكترونيات والسيارات لدول زي مصر .. ليه مصر؟ .. عشان عندنا بنية تحتية قوية .. عمالة مدربة .. وتكلفة تشغيل أقل بكتير من الصين أو أوروبا .. كمان منطقة قناة السويس الاقتصادية بقت مركز صناعي حر بيجذب الشركات بسبب الحوافز زي الرخصة الذهبية وتسهيلات الضرائب.
طيب إيه كمان اللي بيساعد على جذب الاستثمارات؟
مصر استفادت من حرب التعريفات الجمركية بين الصين وأمريكا .. الصين عشان تتفادى الرسوم الجمركية العالية في أمريكا .. بدأت تنقل مصانعها لدول زي مصر وفيتنام .. يعني بدل ما تصنّع في الصين وتدفع ضرائب كبيرة لأمريكا .. بتصنّع في مصر وتصدّر من هنا بتكلفة أقل .. وده بيخلّي مصر مركز تصدير للمنتجات لأفريقيا وأوروبا .. في 2024 .. مصر استحوذت على 25% من الاستثمارات الأجنبية في أفريقيا .. وده رقم كبير جدًا يثبت إننا بقينا الوجهة الأولى في القارة.
كمان.. الحكومة بتعمل مجهود كبير عشان تسهل على المستثمرين .. مثلاً .. الرخصة الذهبية بتقلل وقت إنشاء المشروعات من شهور لأيام.. وفيه أكتر من 1300 فرصة استثمارية متاحة دلوقتي .. والهدف إن الرقم ده يوصل لـ3000 فرصة قريب .. مش بس كده .. مصر وقّعت اتفاقيات تجارة حرة مع أكتر من 70 دولة .. وده بيدي ميزة تنافسية لأي شركة بتستثمر عندنا .. يعني لو شركة عايزة تصدّر لأفريقيا أو الخليج.. مصر هي البوابة.
ونيجي للنقطة المهمة.. إزاي مصر بتستفيد من الاستثمارات دي؟
الاستثمارات الأجنبية بتخلّي الاقتصاد يتحرك .. بتخلق وظايف .. وبتزوّد الصادرات .. في 2023/2024 .. مصر جذبت 46.1 مليار دولار استثمارات أجنبية .. منها 35 مليار من مشروع رأس الحكمة .. وده ساعد على زيادة احتياطي الدولار لـ47.1 مليار دولار في ديسمبر 2024.. يعني السوق بقى فيه سيولة دولارية بتساعد على استقرار الأسعار وتقليل التضخم اللي وصل 13.9% في أبريل 2025.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
