يا ترى إيه اللي بيحصل في أسعار الدهب، ليه سعر الأونصة وصل لـ3320 دولار، وسعر الجرام في مصر وصل لفين دلوقتي، وهل دي فرصة نشتري دلوقتي ولا نستنى؟
اللي بيتابع سوق الدهب اليومين دول، أكيد لاحظ حاجة غريبة، السعر بيعمل قفزات مجنونة، واللي زود النار هو تراجع الدولار الأمريكي قدام معظم العملات، ومنهم طبعا الجنيه المصري اللي عامل شغل عالي دلوقتي وأسهمه بتعلى.
طيب نبدأ منين؟
في الأول، خلينا نوضح إن سعر الأونصة عالما وصل دلوقتي لمستوى تاريخي وهو 3320 دولار للوقية الواحدة، وده رقم عالي، وسبب رئيسي فيه هو ضعف الدولار اللي بيفقد قيمته يوم بعد يوم.
طيب سعر الدهب وصل كام في مصر؟
مع إن الجنيه المصري بدأ يستعيد جزء من قوته، إلا إن سعر الدهب في السوق المحلي مازال عالي بسبب السعر العالمي اللي مولع، ووصل جرام عيار 21 قرب من 4655 جنيه، يعني الناس اللي كانت فاكرة إن الأسعار هتهدى بسرعة لازم تعيد حساباتها.
طب ليه الدهب بيغلى رغم إن الدولار بيقع؟
هنا السر الكبير، وهو لما الدولار بيضعف عالميا، الناس بتلجأ للدهب كملاذ آمن عشان تحصن نفسها من أي أزمات اقتصادية، كمان الاضطرابات الجيوسياسية، والتخوفات من التضخم العالمي بيخلي المستثمرين يسيبوا الفلوس الورق ويشتروا دهب.
فوي كل ده، البنوك المركزية حوالين العالم بتشتري دهب بكميات ضخمة علشان تأمن احتياطاتها بعيد عن الدولار، يعني باختصار كل الظروف شغالة لصالح الدهب.
طب الأسعار رايحة على فين في الفترة الجاية خصوصا في النص التاني من 2025؟
بص يا سيدي، الخبراء بيقولوا إن لو الوضع العالمي فضل زي ما هو، وسعر الدولار استمر في النزيف، ممكن يوصل لمستويات 3500 3600 دولار للأونصة قبل نهاية السنة دي 2025، وده معناه إن الأسعار المحلية كمان هتكمل ارتفاع، خصوصا لو حصل أي توتر سياسي أو أزمة اقتصادية عالمية.
لكن في نفس الوقت، لو حصل هدوء أو البنك الفيدرالي الأمريكي بدأ يرفع الفائدة تاني، ممكن نشوف تصحيح للأسعار ونزول بسيط.
طيب.. نشتري دلوقتي ولا نستنى شوية؟
ده طبعا سؤال بيشغل ناس كتير، بص لو أنت ناوي تشتري دهب كاستثمار طويل المدى، فالخبرا بيقولوا إن الأسعار ممكن تكمل صعود في الشهور الجاية، والشراء دلوقتي ممكن يكون قرار سليم.
لكن لو ناوي تشتري لمناسبة أو هدف قريب، استنى شوية وشوف السوق هيرجع يهدى ولا لأ، لأن السوق حساس لأي خبر اقتصادي أو سياسي.
والخلاصة هي إن الدهب دلوقتي في حالة صعود تاريخي مدعوم بتراجع الدولار وأزمات عالمية متتالية، وسعره في مصر بيتأثر بالسعر العالمي أكتر من المحلي، فلو نناوي تستثمر، الفرصة لسه موجودة، ولو بتفكر في الشراء، فتابع السوق يوم بيوم، ولو عندك دهب متبعوش دلوقتي، لأن الموجة لسه مكملة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
