إيه حكاية جبل الدهب الجديد اللي تم اكتشافه في مصر.. وياترى احتياطياتها بتوصل كام وايه الأهمية الاستراتيجية للاكتشاف وهل دا ليه علاقه بالدولار.
الدهب من أهم المعادن النادرة اللي العالم بيتسابق لتخزينه واكتشافه ودا بسبب أهميته الاقتصادية الكبيرة ولأن الدهب جزء أساسي من مكونات الاحتياطي النقدي في البنوك المركزية للدول وكمان عشان استثمار مهم جداً ودا غير إنه بيعمل عملية توازن في سوق العملات وملاذ آمن للدول والبنوك المركزية وقت الأزمات وكمان المعدن الأصفر بيعتبر أداة من أدوات القوة الاقتصادية والائتماية للدول وعشان كده اللي بيملك الدهب بيملك القوة المالية والأمان ضد الاضطرابات المالية وتقلبات الأسواق.
طيب ليه بنتكلم النهاردة عن الدهب؟
الحقيقة مصر كانت على موعد مع خبر سار جدا في الساعات الأخيرة ودا بعد إعلان الدكتور مصطفى مدبولي رئيس مجلس الوزراء عن اكتشاف منجم دهب كبير وضخم والخبراء وصفوه بأنه جبل سكري جديد وكشف مدبولي إن شركة آتون ريسورسز ودي إحدى شركاء الهيئة العامة للثروة المعدنية المصرية حققت كشف تجاري كبير للدهب في منطقة مناجم ذهب أبو مروات الواعدة والبكر بخامات الدهب واللي بتشتغل فيها شركات عالمية جديدة بعد فتح مجال التنقيب في المنطقة.
ولسه مع مدبولي واللي قال شركة آتون مسجلة في البورصات العالمية وعشان كده أفصحت عن الاكتشاف والأهم بقي في الموضوع كله إن تقديرات الشركة بتقول إن احتياطيات المنجم الجديد من الدهب هيكون كبير وضخم واي شركة عالمية مسجلة في بورصات محترمة مش بتقول اي كلام أو أرقام وخلاص لكن بتقول حقائق وبيانات وتوقعات بناء على دراسات ونتائج.. يعني باختصار الاكتشاف الجديد هيغير خريطة إنتاج الدهب في مصر.
طيب ايه أهمية الاكتشاف دا ؟
زي ما قلنا لحضراتكم الدهب يعني نقد اجنبي في عرف البنوك وملاذ آمن وقوة للدولة وتقدر تبيعه في أي وقت واستبداله دولار مثلا وتقدر تستخدمه في وقت الأزمات الكبرى وغير أن الاكتشاف الجديد هيغري شركات عالمية جديدة للاستثمار في قطاع التنقيب عن المعادن النفيسة في الأراضي المصرية وخاصة أن مصر دولة غنية باحتياطيات الدهب الغير مكتشفة وعندها مناجم ضخمة شغالة بالفعل زي منجم السكري دا ضمن أكبر 10 مناجم في العالم واحتياطياته ضخمة والمصدر الرئيسي للدهب دلوقتي .. وبمناسبة منجم السكري شركة أنجلو جولد أشانتي المشغلة عملت في الأيام الأخيرة استكشافات إضافية وأكدت أن هناك احتياطات تكفي لعشر سنين إضافية من الدهب وإن التوقعات بتقول إن إنتاج الدهب من السكري هيكون أضعاف اللي خرج منه على مدار ال15 سنة اللي فاتت..
وبالارقام سجل حجم إنتاج الدهب في مصر 559 ألف أونصة خلال العام المالي 2023-2024، وأغلبه بيجي من منجم السكري في الصحراء الشرقية بالإضافة إلى مناجم "حمش" و"إيقات"... ودا غير إن مصر فيها اكتر من 100 منجم اغلبها موجود في الصحراء الشرقية ضمن منطقة المثلث الذهبي على مساحة 250 كيلومتر مربع وفيها مناجم واعدة زي أبومروات وحنش ووادي العراقي والبرانية.. وبيعتبر منجم أبومروات أحدث مناجم الدهب في مصر اكتشافا باحتياطيات كبيرة تصل 290 ألف طن.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
