الذهب كل يوم بيسجل انخفاض جديد في الاسعار وده بعد الزيادات الكبيرة اللي وصلت لها الاسعار خلال الأوقات اللي فاتت.. ياتري هل ممكن نشوف اسعار الذهب تنزل لـ4000 جنيه تاني.. ولا الاسعار هتاخذ فترة وترجع ترتفع بقوة الصاروخ.
اسعار الذهب واحدة من الحاجات اللي بتشغل بال ناس كتير في الوقت الحالي خصوصا الناس المهتمة بالاستثمار والأوعية الإدخارية، وكل الناس عندها حب استطلاع لمعرفة توقعات الاسعار للفترة اللي جاية وهل الاسعار مرشحة للانخفاض من جديد الفترة اللي جاية ولا هتاخذ فترة كده وترجع ترتفع تاني من جديد مستقبلا.
التضارب الشديد اللي بيحصل في الاسعار ما بين الارتفاع والانخفاض خلي الناس عندها تخوف من الاستثمار في الذهب، خصوصا ان الاسعار كل يوم بحال يوم في الطالع ويوم في النازل، حتي الخبراء في قطاعات الذهب مش عارفين الاسعار رايحة علي فين، خصوصا ان ارتفاع وانخفاض الاسعار في مصر في الوقت الحالي مرتبط بالاسعار العالمية، واللي هيا مرتبطة بالتوترات والتغيرات الاقتصادية والجيوسياسية.
طيب هل الاسعار مرشحة للزيادة ولا انخفاض الفترة اللي جاية؟.
علشان نفهم اسعار الذهب رايحة علي فين لازم نعرف ان الزيادات الكبيرة اللي وصلت لها اسعار الذهب في مصر واللي وصلت لـ5000 جنية للجرام عيار 21 واللي هو الاكثر انتشارا ومبيعا في مصر كان سبب التوترات الاقتصادية اللي كانت موجودة بسبب الرسوم الجمركية الأمريكية، والانخفاض اللي حصل تاني في الأسعار واللي حاليا بتسجل 4500 جنية للجرام يعني حصل انخفاض اكثر من 500 جنية في الجرام الواحد كان سببه برضوا القرار الأمريكي بتجميد الرسوم الجمركية الأمريكية، واللي كان اخرها القرار الأمريكي بخفض الرسوم الجمركية اللي كانت مفروضه علي الصين لـ30% والرد الصيني اللي كان عليها بخفض الرسوم الجمركية الصينية لـ10% ، وده عمل هدؤء كبير في اسعار الذهب في الوقت الحالي وكان سبب من اسباب الاستقرار النسبي اللي موجود في اسعار الذهب حاليا في العالم واللي انعكس علي الاسعار عندنا في مصر.
خبراء الذهب اجمعوا ان اسعار الذهب في مصر علي الرغم من الانخفاض الكبيرة اللي وصلته له، بس برضوا لسه مرتفعه عن سعرها العادل وده بسبب التوترات الجيوسياسية اللي لسه حتي الان موجود ومستمر بين روسيا وأوكرانيا ده غير التغيرات الجيوسياسية اللي بتحصل في منطقة الشرق الأوسط، واللي لهم تاثير جامد جدا علي اسعار الطاقة والذهب في العالم كله.
الخبراء اكدوا انه في حالة التوصل لاتفاق بشان تسوية الازمات الجيوسياسية الموجودة حاليا بين دول العالم ووضع حد لنهاية الصراع في منطقة الشرق الأوسط وتسوية الازمة الأوكرانية باسعار الذهب هتكون مرشحة لانخفاض كبير في الأسعار وساعتها هيوصل سعر الجرام عيار 21 واللي هو الاكثر مبيعا وانتشارا في مصر لـ4150 جنية للجرام، وده هو السعر الرسمي والعادل لاسعار الذهب في مصر .
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
