كل يوم بنسمع قصص وحكايات عن ناس اتنصب عليهم بسبب نقاط المكافآت.. فيا ترى إزاي النصب ده بيحصل؟ وايه الحيل اللى بيستخدمها النصابين للإيقاع بالضحايا؟ وإزاي تحمي نفسك ومتخليش حد يضحك عليك؟
زي ما إحنا عارفين.. البنوك بتشجعك تستخدم الكارت بتاعك في كل حتة.. سوبرماركت، بنزينة، أونلاين.. ولما تصرف كتير بيدوك نقاط مكافآت.. النقاط دي زي فلوس افتراضية تقدر تستبدلها بحاجات زي تذكرة طيارة.. أجهزة كهربائية.. أو حتى تاخدها كاش.. و البنك بيبعتلك رسالة أو إيميل يقولك: "ادخل على موقعنا، إستبدل نقاطك من صفحة المكافآت!" وهنا بتبدأ اللعبة.
النصابين عارفين إنك بتحب تكسب نقط كتيرة وإنك هتتحمس لما تشوف عرض مغري.. فبيعملوا إيه؟ بيصمموا صفحة على الإنترنت شبه صفحة البنك بالظبط اللوجو، الألوان، الكلام، كله زي الموقع الرسمي. بس طبعًا، الصفحة دي مزيفة 100%
بعدها .. بيبعتولك رسالة على الواتساب أو الإيميل يقولوا لك: "إستبدل نقاطك دلوقتي وخد هدية قيمتها 5000 جنيه!" أو "آخر يوم لاستبدال النقاط، إضغط على اللينك دا!" واللينك بيوديك للصفحة الوهمية
ولما تدخل على الصفحة، بيطلبوا منك بيانات كارتك: الرقم، تاريخ الانتهاء، والـ 3 ارقام اللي ورا الكارت)و يقولولك إن دا عشان "تأكيد استبدال النقاط"
وأول ما تحط البيانات دي يا معلم ، النصاب بيستخدمها عشان يسحب كل الرصيد اللي في الكارت! مش بس كده، ممكن يستخدم الكارت في عمليات شراء أونلاين أو يبيعه لنصاب تاني. وإنتَ؟ لا استبدلت نقاط ولا ليك رصيد في الكارت خلاص
طب إزاي النصاب بيضمن إنك تقع؟
النصابين دول مش مجرد حرامية.. دول فيهم ناس أساتذة في علم النفس.. بيستخدموا حاجات زي انهم يغروك بعروض تخلّيك تحس إنك لازم تتحرك بسرعة، زي: "العرض ساري لمدة 24 ساعة بس!"
كمان الصفحة بتبقى شبه الرسمية أوي،فإنتَ بتحس إنك في أمان. كمان بيستخدموا أرقام تليفونات أو إيميلات شبه ايميلات البنوك الرسمية
وخد بالك مش كل الناس عارفة إن استبدال النقاط ما بيطلبش بيانات الكارت أصلاً.. لأن البنك عنده بياناتك فمش هيطلبها منك تاني
نيجي لسؤال مهم.. إزاي تحمي نفسك؟
لو جالك إيميل أو رسالة فيها لينك لاستبدال النقاط.. إدخل على موقع البنك بنفسك من المتصفح.. ومتستخدمش اللينك اللي بعتوه
لو أي صفحة طلبت منك ال 3 أرقام اللى ورا الكارت عشان تستبدل نقاط إعرف إنها نصب.. البنك عنده بياناتك أصلاً
لو حصل ودخلت بياناتك على صفحة مشبوهة.. كلّم البنك فورا واطلب إيقاف الكارت.
لو مش متأكد.. كلّم خدمة العملاء على الرقم الرسمي بتاع البنك.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
