هو إيه اللي بيحصل في سوق الصرف في مصر اليومين دول؟ .. وهل الدولار اللي كان طاير في السما فعلاً بدأ يهبط ويسيب مكان للجنيه المصري يستعيد قوته؟ وإزاي الاقتصاد المصري بيخطو خطوات واثقة نحو التعافي؟ و إيه اللي بيدعم الجنيه حاليا .. وتوقعات المؤسسات الدولية للاقتصاد المصري في 2025 و2026 بتقول إيه؟
الجنيه المصري كان في معركة حقيقية مع الدولار الفترة اللي فاتت .. الدولار وصل لمستويات قياسية فوق الـ51 جنيه في بعض البنوك زي مصرف أبوظبي الإسلامي بنهاية أبريل 2025 .. لكن فجأة.. الوضع بدأ يتغير.. في الأيام الأخيرة.. سعر الدولار بدأ يهدى وينزل بشكل ملحوظ .. وفقاً لآخر تحديثات البنك المركزي المصري.. الدولار استقر عند حوالي 50.10 جنيه للشراء و50.19 جنيه للبيع .. وده أقل مستوى للدولار من أكتر من شهر .. يعني إيه؟ .. يعني الجنيه بدأ يكسب أرض جديدة.. وده مش مجرد أرقام.. ده مؤشر إن السوق بيستعيد توازنه تدريجيا.
طب إزاي ده حصل؟
خليني أحكيلك القصة من الأول .. الاقتصاد المصري كان بيواجه تحديات كبيرة السنين اللي فاتت .. من نقص العملة الأجنبية.. لارتفاع التضخم.. لضغوط الديون الخارجية .. لكن فيه حاجات إيجابية بدأت تظهر.. أولها إن تدفقات النقد الأجنبي زادت بشكل ملحوظ .. تحويلات المصريين في الخارج وصلت لـ18.1 مليار دولار في أول عشر شهور من 2024.. بزيادة 36% عن السنة اللي قبلها .. ده غير صفقة رأس الحكمة اللي جابت 35 مليار دولار.. ودي كانت بمثابة دفعة قوية للاحتياطي الأجنبي .. اللي وصل لـ48.144 مليار دولار بنهاية أبريل 2025 .. وده أعلى مستوى من خمس سنين.
مش بس كده.. فيه إجراءات اقتصادية كبيرة اتخذتها الحكومة والبنك المركزي .. زي تحرير سعر الصرف في مارس 2024 .. اللي خلّى السوق يتحرك بناءً على العرض والطلب .. وده ساعد على القضاء على السوق السوداء.. وكمان زاد ثقة المستثمرين الأجانب .. اللي بدأوا يرجعوا يستثمروا في أذون الخزانة بقيمة وصلت لـ37.5 مليار دولار من ساعة التعويم .. يعني السوق بقى أكتر استقرارا.. والجنيه بدأ يسترد عافيته.
طب إيه بقى توقعات المؤسسات الدولية للاقتصاد المصري؟
هنا بقى الحاجات الحلوة.. مؤسسة "هيرميس" توقعت إن الناتج المحلي الإجمالي هينمو بنسبة 4.7% في السنة المالية 2025/2026 .. مقارنة بـ3.7% في السنة الحالية .. وده يعني إن الاقتصاد بيخطو خطوات ثابتة لقدام .. كمان توقعوا إن احتياطي النقد الأجنبي هيزيد لـ45.1 مليار دولار بنهاية السنة المالية الجاية .. وده بيدّي دعم قوي للجنيه.
صندوق النقد الدولي كمان متفائل .. جهاد أزعور.. مدير الشرق الأوسط وآسيا الوسطى في الصندوق.. قال إن معدل النمو المتوقع للاقتصاد المصري هيوصل لـ3.8% في السنة المالية 2024/2025.. وهيطلع لـ4.3% في 2025/2026 .. وده بيجي مع توقعات بانخفاض التضخم لـ12% في السنة الجاية .. وده بيحصل بفضل استمرار برنامج الإصلاحات الاقتصادية .. زي تعزيز دور القطاع الخاص وتسريع برنامج الطروحات الحكومية .. اللي بيفتح الباب لاستثمارات جديدة.
لكن مش كل حاجة وردي يعني .. فيه تحديات لسه قدامنا .. زي ضغوط الديون الخارجية اللي هتكون حوالي 22.4 مليار دولار في 2025 .. وكمان انخفاض صافي الأصول الأجنبية للقطاع المصرفي اللي ممكن يوصل لـ5.8 مليار دولار .. بس الإيجابيات اللي بنشوفها دلوقتي بتدّينا أمل إن الاقتصاد قادر يتغلب على التحديات دي لو استمرينا في الإصلاحات.
فاللى لازم تعرفه.. ان الجنيه المصري دلوقتي بيخوض معركة قوية .. بس المؤشرات بتقول إنه بدأ يكسب .. الدولار بينزل.. الاحتياطي بيزيد.. والتوقعات الدولية متفائلة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
