هو ليه الدولار بقاله كام يوم بينزل.. وإيه اللي رجّع الجنيه ياخد نفسه من جديد.. هل فعلاً فيه سيولة دولارية ولا ده مجرد هدوء مؤقت قبل العاصفة؟ والسؤال الأهم.. الدولار هيفضل ينزل ولا راجع يطلع تاني؟
من آخر الشهر اللي فات والدولار دخل في موجة تراجع واضحة قدام الجنيه المصري.. وبعد ما كان لامس الـ51 جنيه في بعض البنوك.. النهارده بقى بيتراوح بين 50.08 و50.47 في أغلب البنوك.
طب إيه اللي حصل؟ وليه التراجع ده حصل دلوقتي بالذات؟
ببساطة.. في كذا سبب ورا الحركة دي.. أولهم إن بعثة صندوق النقد الدولي موجودة دلوقتي في القاهرة علشان تعمل المراجعة الخامسة لبرنامج التمويل مع الحكومة المصرية.. المراجعة دي بتركز على حاجات مهمة زي الإصلاحات الهيكلية وخفض الدين وضبط الموازنة.. وكل ده بيبعث رسالة طمأنة للأسواق والمستثمرين إن الوضع بيتحسن وإن الحكومة ماشية على الطريق اللي اتفقوا عليه.
في نفس الوقت.. فيه نقطة مهمة وهي السيولة الدولارية.. البنك المركزي أعلن عن قفزة ضخمة في تحويلات المصريين من الخارج..
وده من أكبر مصادر الدولار في مصر.. التحويلات زادت بنسبة 72.4% ووصلت لـ32.6 مليار دولار من مارس 2024 لحد فبراير اللي فات.. وده رقم تاريخي.
فبراير اللي فات لوحده سجل 3 مليار دولار تحويلات.. مقابل 1.3 مليار في نفس الشهر من السنة اللي قبليها.. وده معناه إن فيه تدفق دولارات داخل البلد مش قليل.
غير كده.. الاحتياطي النقدي كمان ارتفع بنحو مليار دولار من بداية السنة لحد نهاية أبريل.. ووصل لـ48.1 مليار دولار.. وده رقم مش بسيط في ظل الظروف الحالية.
كل العوامل دي خلت السوق يحس إن فيه نوع من الاستقرار.. وإن الضغط على الدولار قل.. وبالتالي السعر بدأ يهدى شوية.
هل ده معناه إن الدولار هيكمل في النزول؟
الحقيقة إن ده بيعتمد على كذا حاجة.. أهمهم استمرار تدفق السيولة من مصادر زي التحويلات والسياحة والاستثمار الأجنبي.. وكمان تنفيذ الحكومة للإصلاحات اللي اتفقت عليها مع الصندوق.
صندوق النقد نفسه رفع توقعاته لقيمة الجنيه شوية.. وقال إن متوسط سعر الدولار في السنة المالية الحالية هيبقى حوالي 49.6 بدل 50.6.. وقلل كمان توقعاته للسنين الجاية.
بس برضه لازم ناخد بالنا إن جزء كبير من التراجع الحالي ممكن يكون مرتبط بجو الهدوء اللي دايمًا بيحصل وقت زيارات الصندوق.. وده معناه إن الاستمرار في النزول مش مضمون إلا لو العوامل الإيجابية فضلت مستمرة.
الحاجة الأكيدة.. الدولار بينزل دلوقتي فعلاً.. والجنيه بيسترد بعض قوته.. بس السوق حساس وأي تغيير في المعطيات ممكن يرجّع الكفة تتقلب تاني.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
