يا ترى ايه حكاية الصفقة الكبرى اللى هتتم بين مصر وروسيا اليام الجاية. وإزاي الصفقة دي هتخفف الضغظ عن الدولار.؟ وايه اهمية وصول تسويات المعاملات التجارية بين موسكو والقاهرة بعيد عن الدولار واليورو الى أكتر من 40 %؟
في البداية كده .. خلينا نفهم الصورة كاملة .. مصر وروسيا وقّعوا اتفاقية مؤخرا لإنشاء منطقة صناعية روسية في المنطقة الاقتصادية لقناة السويس .. الاتفاق بيقول إن روسيا هتستخدم قطعة أرض في المنطقة دي بنظام حق الانتفاع لمدة 3 سنين من غير تكلفة عشان تبدأ البناء فورًا .. يعني شركات روسية هتبني مصانع في مصر .. ومش أي مصانع .. مصانع في مجالات زي الأدوية والكيماويات والهندسة ومواد البناء .. وده حسب كلام أنطون أليخانوف وزير الصناعة والتجارة الروسي.
وإيه اللي يخلّي المشروع ده مميز؟
قناة السويس مش مجرد ممر ملاحي .. دي بوابة تجارية عالمية .. مصر عندها أكتر من 70 اتفاقية تجارة حرة مع دول في إفريقيا والشرق الأوسط .. يعني أي منتج يتصنع في المنطقة دي هيبقى عنده ممر مفتوح لأسواق ضخمة .. الشركات الروسية هتستفيد من ده عشان تصدّر بضاعتها بسهولة .. ومصر هتستفيد من الاستثمارات دي في خلق فرص شغل وزيادة الإنتاج المحلي .. ومش بس كده .. الشركات الروسية هتبيع جزء كبير من إنتاجها في السوق المصري نفسه .. يعني هتأمّن حصة في السوق وتقلل الاعتماد على الاستيراد.
نيجي للنقطة التانية المهمة .. تسوية 40% من المعاملات التجارية بين مصر وروسيا بعملات غير الدولار واليورو .. دي خطوة كبيرة .. ليه؟ .. عشان مصر بتعاني من شح في العملة الأجنبية من سنين .. الدولار تحديدًا بقى تحدي كبير للاستيراد وتغطية احتياجات السوق .. لما بتستخدم عملات تانية زي الروبل الروسي أو حتى الجنيه المصري في التجارة .. ده بيقلل الضغط على احتياطي الدولار .. وده بيخلّي مصر تقدر توفر الدولار لاستيراد حاجات أساسية زي القمح أو مستلزمات الإنتاج.
يعني لو مصر بتشتري بضاعة من روسيا بقيمة مليار دولار .. 40% من المبلغ ده هيتسدد بعملات تانية .. يعني هتوفّر حوالي 400 مليون دولار من الضغط على احتياطي العملة الأجنبية .. وده مش رقم صغير .. حسب تقارير اقتصادية .. لو مصر وسّعت المعاملات دي مع دول تانية زي الصين والهند .. ممكن توفّر مليارات الدولارات سنويًا .. وده هيساعد في استقرار سوق الصرف وتقليل أزمة العملة.
وإيه تأثير ده على المواطن العادي؟
لما الضغط على الدولار يقل .. أسعار السلع المستوردة هتبقى أكتر استقرارًا .. والشركات هتقدر تستورد خامات بسهولة أكتر .. يعني الإنتاج المحلي هيزيد والأسعار ممكن تتحسن على المدى الطويل .. ومع زيادة فرص الشغل من المصانع الجديدة .. الاقتصاد هياخد نفس جديد.
بس خلينا واقعيين .. المشروع ده لسه في بدايته .. الـ3 سنين دول فترة تحضيرية .. يعني النتايج الكبيرة ممكن تتأخر شوية .. وكمان لازم يكون في متابعة قوية عشان المشروع يتحقق زي ما هو مخطط .. لكن اللي واضح إن مصر بتحط رجلها على طريق الاستثمار الذكي .. وروسيا بتدّي ثقلها للمشروع ده عشان تستفيد من موقع مصر الاستراتيجي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
