السبت، 13 سبتمبر 2025 12:20 ص 9/13/2025 12:20:00 AM
تحدث محمد بركات نجم منتخب مصر السابق، عن قرار كابتن محمود الخطيب، بشأن الاعتذار عن الاستمرار في رئاسة النادي الأهلي.
تصريحات محمد بركات
قال محمد بركات: “القرار كان مفاجئ لينا، لإن الكابتن الخطيب قيمة كبيرة جدًا في الأهلي، وخدم النادي 50 سنة لاعب، مدير كورة، عضو مجلس إدارة، ورئيس نادي”.
وتابع عبر برنامج الكورة مع فايق: “الخطيب مهم لينا كلنا، وكلامه مع اللعيبه إمبارح صداه كبير، بس صحة الكابتن الخطيب أهم وأغلى من أي حاجة”.
وأكمل: “هو جه على نفسه كتير، كان بيروح رحلته العلاجية ويخلصها ويرجع على طول، لأنه الكبير بتاع الأهلي ووجوده ضروري”.
وزاد: “فكرة إنه يبقى مش موجود فجأة، دي حاجة صعبة جدًا، وأنا بتمنى إنه يتراجع عن قراره”.
وواصل: “الكابتن الخطيب قيمة كبيرة جدا بالنسبة للأهلي وجمهوره من ساعة ما كان لاعب ولحد النهاردة، انت بتتكلم في دورتين بتتكلم في نجاحات غير طبيعية، سواء لفرقة الكورة أو لألعاب الصالات فوق الـ 120 بطولة”.
وزاد: “الخطيب بالنسبة للناس هو الكبير واللي كل الناس بترجعله في أي حاجة، الكلمتين اللي بيتكلمهم الخطيب مع اللعيبة غير ما أي حد يكلمهم”.
وأتم حديثه: “إمبارح سمعنا إن البيان هينزل واتأجل وبعدين نزل، وده خلاني أقلق، ونفسي الكابتن الخطيب يراجع نفسه من غير ما ده ياجي على حساب صحته”.
بيان الخطيب بالابتعاد عن رئاسة الأهلي
زملائي أعضاء مجلس إدارة النادي الأهلي، منذ ثماني سنوات، تعاهدنا مع جماهير النادي الأهلي وأعضائه، أن نعمل بإخلاص وبجهد ورؤية ليبقى الأهلي على القمة دائما بتاريخه ومبادئه وبطولاته، وبتطوير مستمر لمنشآته وخدمات أعضائه.
وعلى مدار دورتين انتخابيتين، تشرفت برئاسة مجلس الإدارة وبالعمل معكم - ومع زملائكم أعضاء المجلس السابق - من أجل رفعة نادينا على كل المستويات الرياضية والاقتصادية والإدارية والإنشائية والخدمية والمجتمعية، فكان كل بناء أو تطوير، أو إنجاز أو بطولة في كل الألعاب، هو نتاج عمل مؤسسي، وجهد جماعي، ووعي بمكانة وقيمة النادي الأهلي محليا وإفريقيًا وعالميًا، فلكم كل الشكر والتقدير.
