أول تعليق من عماد النحاس بعد تعادل الأهلي مع إنبي: «مش عارف أقول إيه»

عبّر عماد النحاس، المدير الفني للنادي الأهلي، عن إحباطه بعد تعادل فريقه مع إنبي في المباراة التي جمعتهما مساء اليوم، مؤكدًا أن الفريق كان يطمح لتحقيق الفوز والخروج بالنقاط الثلاث.

النحاس: التغييرات اللي عملناها ما استفدنّاش بها بالشكل المطلوب

وقال النحاس في المؤتمر الصحفي الذي أقيم عقب اللقاء: «المواقف اللي زي دي بصراحة محدش بيبقى عارف يقول فيها إيه، كنا داخلين بنلعب على الفوز، لكن ماقدّمنش المستوى اللي كنا بنأمله خاصة في الشوط التاني».

وتحدث مدرب الأهلي عن ركلة الجزاء التي احتسبت على فريقه، مشيرًا إلى وجود حالة مشابهة في الشوط الأول لصالح تريزيجيه لم يتم احتسابها: «زي ما اتحسبت علينا ضربة الجزاء، كان في كورة تريزيجيه اللي اتشد فيها بوضوح وكان ممكن تتحسب، اللي حسب الأولى المفروض يحسب التانية لازم يكون فيه عدالة».

وأضاف النحاس: «حصل توتر كبير في آخر المباراة، والتغييرات اللي عملناها ما استفدنّاش بها بالشكل المطلوب، وده بسبب غياب التركيز في اللحظات الحاسمة».

وبعدها سأله أحد الصحفيين المتواجدين عن سبب عدم استفادة الأهلي بالتبديلات كان رده: «لا أنا مقولتش كدا».

وعن مشاركة زيزو رغم إصابته خلال عمليات الإحماء، أوضح النحاس: «مخاطرناش بمشاركة زيزو، اللاعب أبلغنا إنه جاهز وسليم تمامًا، وده اللي أكده بنفسه، علشان كده تم الدفع بيه في التشكيل الأساسي».