أحد الناجين من حادث قطار مطروح: سمعنا "طقطقة" والعربيات اتقلبت

كشف أحمد مصطفى، أحد الناجين من حادث قطاع مرسى مطروح، تفاصيل الحادث الذي أودى بحياة 3 ركاب وإصابة 94 أخرين.

وقال مصطفى في مداخلة مع برنامج "على مسؤوليتي" المذاع على قناة "صدى البلد": "أنا أحد الناجين الحمد لله القطر كان ماشي في طريقه عادي، وسمعنا صوت طقطقة في الأرض من تحت، وبعد كده القطر خرج عن المسار بتاعه والعربيات اتقلبت".

وأضاف: "القطر كان ماشي بسرعته العادية خالص، ما كانش سريع وما سمعناش إنه خبط في حاجة، إحنا بس سمعنا الصوت تحت في القضبان، وبعد كده خرج عن المسار".

وتابع: "العربيات كلها اتقلبت، عربية جرّت وراها عربية ورا عربية ولما طلعنا وخرجنا، الإزاز كان مكسور وبنشكر الأهالي اللي وقفوا جنبنا، جابوا لنا مياه، وساعدوا الناس إنها تخرج".

وواصل: "إحنا دلوقتي راكبين عربية ربع نقل في الطريق رايحة أكتوبر، ما لحقناش الأوتوبيسات اللي راحت، إحنا اتحركنا على طول عشان كانت الأسرة متوترة شوية وخرجنا بسرعة".

وأكمل: "أنا كنت في العربية الخامسة، وهي والعربيات الثالثة والرابعة من أكتر العربيات اللي اتأثرت".

وسبق أن أعلنت وزارة الصحة مقتل 3 أشخاص وإصابة 94 آخرين، اليوم السبت، في حادث انقلاب عربات قطار ركاب بمحافظة مطروح غربي البلاد.

ووقع الحادث قرب مدينة الضبعة إثر خروج 7 عربات عن القضبان وانقلاب اثنتين، وكان القطار قادما من مطروح ومتوجها إلى الإسكندرية.

وهرع أهالي المنطقة لمساعدة وإنقاذ الركاب، وقالت وزارة الصحة إنه تم نقل المصابين إلى مستشفى الضبعة المركزي.