يا ترى ايه اللى هيحصل بعد 3 ايام ؟ ويه العالم كله بيحبس انفاسه ومستني يشوف ايه القرارات اللى هتصدر؟ وايه تأثير القرارت دي على الأواق؟ والأهم إيه تأثيرها على الدولار والدهب؟
العالم كله على موعد مع اجتماع مهم جداً.. اجتماع الفيدرالي الأمريكي يوم 17 و 18 سبتمبر.. واللي هيصدر فيه قرار مصيري بشأن سعر الفايدة.. بعد ما كان الفيدرالي ثبت سعر الفايدة لفترة طويلة.. دلوقتي كل التوقعات بتشير إنه هيخفضها.. وده هيحصل لأول مرة من فترة طويلة جداً.
طيب.. إيه السيناريوهات المتوقعة؟
السيناريو الأول والأكثر ترجيحاً إن الفيدرالي هيخفض سعر الفايدة بمقدار ربع نقطة مئوية.. يعني 25 نقطة أساس.. وده السيناريو اللي أغلب المحللين والأسواق بتتوقعه.. وده بسبب إن معدلات التضخم في أمريكا بدأت تنزل.. وكمان فيه علامات على ضعف في سوق العمل الأمريكي.
السيناريو التاني وده احتمال ضعيف .. إن الفيدرالي هيخفض الفايدة بمقدار نص نقطة مئوية.. يعني 50 نقطة أساس.. الاحتمال ده ضعيف جداً.. لكنه موجود.. وده لو الفيدرالي قرر إنه يسرع وتيرة الخفض عشان يدعم الاقتصاد بشكل أقوى.. وده هيحصل لو البيانات الاقتصادية اللي هتظهر الفترة الجاية كانت أضعف من المتوقع.
السيناريو التالت إن الفيدرالي هيثبت سعر الفايدة.. الاحتمال ده بعيد جداً.. لإن أغلب المسؤولين في البنك أشاروا إلى إن الوقت مناسب للخفض.. لكنه ممكن يحصل لو ظهرت مفاجآت في بيانات التضخم أو سوق العمل قبل الاجتماع.
كل سيناريو من دول ليه تأثير مباشر على الدهب والدولار.. العلاقة بينهم علاقة عكسية.. لو الفيدرالي خفض الفايدة..الدهب سعره هيزيد.. لإن الفايدة المنخفضة بتخلي الاستثمار في السندات الحكومية والدولار أقل جاذبية.. فالمستثمرين بيجروا على الدهب كملاذ آمن.. وبيزيد الطلب عليه.. وبالتالي سعره بيزيد.
أما الدولار فسعره هينزل.. لإن خفض الفايدة بيقلل من جاذبية الدولار.. وبيخلي المستثمرين يبدلوا الدولار بعملات تانية أو يستثمروا في أصول تانية زي الدهب.
طب لو الفيدرالي ثبت الفايدة.. ساعتها الدهب سعره ممكن ينزل أو يستقر.. لإن تثبيت الفايدة بيخلي الدولار قوي.. وده بيضغط على سعر الدهب.
والدولار سعره هيزيد.. لإن المستثمرين هيفضلوا محتفظين بالدولار.. لإن سعر الفايدة المرتفع بيقدم لهم عائد كويس.
الأسواق دلوقتي بتعيش حالة من عدم اليقين.. ده بسبب التوترات الجيوسياسية.. والديون الأمريكية.. والجدل حوالين استقلالية الفيدرالي.. كل ده بيخلي المستثمرين يروحوا للدهب كملاذ آمن.. وده اللي خلاه يحطم أرقام قياسية.. ويوصل لمستويات تاريخية في الفترة اللي فاتت.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
