لما بنتكلم عن أغنى أغنياء العالم.. العقل دايماً بيروح لإيلون ماسك.. جيف بيزوس.. مارك زوكربيرج.. أسماء لامعة.. مالية الدنيا وشاغلة الناس.
لكن في سباق الأثرياء ده.. فيه اسم تاني طلع فجأة.. ووصل للمرتبة التانية.. وهو الملياردير الغامض لاري إليسون.
راجل محدش يعرفه برا أمريكا كتير.. لكن ثروته وصلت لـ 250 مليار دولار.. متجاوزاً مارك زوكربيرج نفسه.. وراه قصة غريبة جداً.. مليانة غموض.. ونفوذ.
لاري إليسون.. مش مجرد رجل أعمال عادي.. ده راجل بيلعب على مستوى تاني خالص.. ورا كواليس الإعلام.
الراجل ده.. شركته "أوراكل".. ليها علاقة قوية جداً بالـ"سي آي إيه".. وكالة الاستخبارات الأمريكية.. شركته بتخزن بيانات حساسة جداً لوكالات الأمن القومي.. وده بيدي له نفوذ سياسي واقتصادي.. أقوى بكتير من أي حد تاني.
في سنة 1977.. لاري إليسون أسس شركة "أوراكل".. وقتها كانت مجرد شركة صغيرة.. بتعمل برامج قواعد بيانات. لكن هو حولها.. لعملاق من عمالقة التكنولوجيا في العالم.. قيمتها السوقية دلوقتي.. فوق الـ 660 مليار دولار.
لكن القفزة الأهم.. كانت مع بداية عصر الذكاء الاصطناعي.. بعد ما "شات جي بي تي" طلع.. سهم "أوراكل" تضاعف 3 مرات.. ليه؟ لأنهم وقعوا عقود ضخمة.. علشان يخزنوا ويعالجوا بيانات شركات الذكاء الاصطناعي.
لاري إليسون.. مش بس في المكاتب.. هو محارب في كل حتة.. في الإدارة.. وفي الاستثمار.. وفي حتى هواياته.
بيشارك في سباقات اليخوت.. مش علشان الترفيه.. لأ.. علشان يكسب وبس.. في استثماراته.. أسلوبه هجومي جداً.. بيعمل صفقات استحواذ قسرية.. ولو الموظف أو المدير مش بيحقق نتائج.. ممكن يمشيه في أي وقت.
ورغم كل الغموض اللي حواليه.. تسربت تفاصيل عن حياة لاري إليسون المترفة..ويقال انه بيمتلك طيارات ويخوت فارهة.. ومش بس كده.. ده عنده جزيرة خاصة في هاواي.
في مقابلة قديمة.. لما سألوا إيلون ماسك.. مين أذكى شخص تعرفه؟ كانت إجابته.. لاري إليسون.. من غير تردد.
فهل ممكن يكون الراجل الغامض ده.. هو الأذكى فعلاً.. والأكثر نفوذاً.. في عالم المال والتكنولوجيا؟
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
