منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري، البداية بتقرير عن الصين خارج معادلة الديون المصرية.. بداية انفراجة اقتصادية.
أكد التقرير، أن مصر بتواجه تحديات اقتصادية كبيرة أثرت بشكل مباشر على أهم مصادر إيراداتها، أبرزها قناة السويس التي تراجعت إيراداتها بأكثر من 70% بما يعادل نحو 7 مليارات دولار مقارنة بالأعوام السابقة، إضافة إلى قطاع السياحة اللي رغم تحقيقه رقمًا قياسيًا بلغ 15.4 مليون سائح بإيرادات تجاوزت 15 مليار دولار، إلا أن الأرقام كانت أقل من المستهدف بكثير، والظروف دي فرضت على مصر ضغوط وده اللي دفع الدولة للاقتراض من الصين وده خلى ديون مصر بلغت نحو 8.2 مليار دولار من إجمالي دين خارجي وصل إلى 155.2 مليار دولار.
وكشف تقرير بانكير، أن مصر هتقدر تتخلص من الديون دي عن طريق، توقيع مذكرة تفاهم خلال منتدى الحزام والطريق في أكتوبر 2023 مع الحكومة الصينية لمبادلة الديون مع الصين وتحويلها لتمويل مشاريع تنموية، وبعدها مصر بدأت مفاوضات مع الصين لمبادلة دين بقيمة هتتراوح من 100 إلى 120 مليون دولار لمشاريع تنموية خضراء، وده لأن مصر لها أكتر من تجربة في فكرة تحويل الديون الخارجية الي استثمارات في السوق المصري، ومصر نفذت برامج مبادلة ديون مع إيطاليا وألمانيا بقيمة نحو 730 مليون دولار وحولتهم لاستثمارات في 120 مشروع تنموي في مجالات زي الزراعة والتعليم والطاقة والمياه.
منصات بانكير قدمت تقرير مختلف النهاردة عن أسباب خطة الدولة للتوسع في حصيلة الضرائب.
أكد التقرير، أنه في أول 5 شهور من السنة المالية 2024/2025، وصلت الإيرادات الضريبية إلى 715 مليار جنيه، بزيادة 39% بالمقارنة بنفس الفترة في السنة اللي فاتت، ومن يوليو إلى أكتوبر 2024، ارتفعت الضرائب إلى 560.7 مليار جنيه بنسبة 38.3% مقارنة بالفترة نفسها من السنة اللي فاتت، الميزانية العامة للسنة المالية 2025/2026، بتستهدف الدولة 2.6 تريليون جنيه كإيرادات ضريبية بما يعادل 13% من الناتج المحلي الإجمالي.
وأضاف التقرير، أن الأسباب اللي خلت حصيلة الضرائب ترتفع للأرقام دي، منها تحسن تحسن النشاط الاقتصادي، وتحسن الوضع النقدي وسعر صرف الجنيه واللي ساعدوا في رفع الإيرادات الحكومية، خصوصا من الضرائب على الدولار زي إيرادات قناة السويس والشركات الأجنبية، ده غير خطط الدولة للتوسع في رقمنة النظام الضريبي والعمل بنظام الفوترة الإلكترونية، والنظام الموحد للضرائب على الرواتب، ودمج الاقتصاد غير الرسمي، وده كله ساهم في زيادة الالتزام وكفاءة التحصيل.
ده طبعا بالإضافة للإجراءات اللي عملتها الدولة ضد التهرب الضريبي وتحسين الرقابة وزيادة التقدير الضريبي، واسترجاع ضرائب متأخرة وصلت لأكثر من 12 مليار جنيه.. والنمو الكبير اللي حصل في الإيرادات الضريبية هيساعد الدولة في خفض العجز وتقليل الدين العام والحد من عجز الميزانية لـ 7.3% من الناتج المحلي، وتحقيق فائض أولي نسبته 4% من الناتج المحلي، وهتكون سبب كبير في خفض الدين العام من 92% إلى 83% من الناتج المحلي خلال السنة المالية الحالية.
وحدة أبحاث بانكير قدمت تقرير خاص النهاردة عن شروط التقدم لوظائف مشروع المونوريل في مصر 2025
أكد التقرير، أن الشركة المصرية لإدارة وتشغيل مترو الأنفاق أعلنت رسميًا عن فتح باب التقديم لعدد من الوظايف الجديدة، وده للعمل في مشروع مونوريل شرق النيل، واللي يعتبر واحد من أكبر مشروعات النقل الذكي في مصر دلوقتي.. المشروع ده مش أي كلام، ده بيربط القاهرة بالعاصمة الإدارية الجديدة، وهدفه يقلل الزحمة المرورية الرهيبة اللي على الطرق ويخلي التنقل أسهل وأسرع وأأمن، يعني مش مجرد مشروع مواصلات عادي، لأ ده نقلة حضارية بجد.
وأوضح تقرير بانكير، أن الوظايف اللي مطلوبة متنوعة، ودي فرصة كبيرة للي عنده خبرة أو حتى لسه بادئ وعايز يثبت نفسه، والوظايف هي فني إصلاح أعطال كهرباء أو ميكانيكا ومراقب تحكم مركزي تخصص كهرباء أو اتصالات أو إلكترونيات وفني أنظمة كهرباء، إلكترونيات، اتصالات أو ميكانيكا وفني وحدات متحركة كهرباء أو ميكانيكا، يعني التخصصات كلها في مجالات مطلوبة جدًا وسوقها كبير، والمشروع ده كمان هيضيف خبرة عالمية لأي حد يشتغل فيه.
وكشف التقرير، أن المواعيد المتاح التقديم فيها من يوم 26 أغسطس 2025 ولحد 4 سبتمبر 2025، يعني معاك فترة حوالي أسبوع ونص. بس خلي بالك، يوم الجمعة مش هيبقى فيه تقديم.. وفي طريقين تقدر تقدم بيهم هما: يا إما أونلاين من خلال الموقع الرسمي للشركة المصرية لتشغيل المترو، يا إما تروح بنفسك مقر الشئون الإدارية في مبنى حمامات القبة من الساعة 9 الصبح لحد 1 الظهر.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
