يا ترى ليه بنك من أكبر بنوك العالم.. زي HSBC.. يقرر فجأة ينهي تعامله مع مئات من أغنى أغنياء الشرق الأوسط..؟ ناس أصولهم بتوصل لملايين.. بل ومئات الملايين من الدولارات.؟ هل فيه حاجة غلط في العملاء دول.. ولا فيه حاجة غلط في البنك نفسه..؟ وليه بنوك تانية كتير بدأت تمشي في نفس الطريق.. وبتتصرف بنفس الطريقة الغريبة دي؟ وإيه اللي بيحصل في كواليس البنوك السويسرية السرية.. اللي محدش يعرف عنها حاجة؟
اللي بيحصل ده مش صدفة أبدا .. الموضوع بدأ من فترة.. لما بنك HSBC في سويسرا قرر يعمل إعادة هيكلة لأنشطته.. وبدأ يركز أكتر على العملاء اللي بيعتبرهم "أكثر أمانًا".. وفي المقابل.. قرر يقلل من تعامله مع العملاء المصنفين "عاليي المخاطر".. والمخاطر هنا.. مش معناها إنهم ناس وحشة.. أو بيعملوا حاجة غلط.. لا خالص.. المخاطر في عالم البنوك.. ليها معاني تانية كتير.. ممكن تكون مرتبطة بحجم الأصول الكبيرة جدا.. أو طبيعة مصدر الفلوس دي.. أو حتى البلد اللي جاي منها العميل.. وده بالظبط اللي حصل مع عملاء HSBC.
القرار ده أثر على أكتر من ألف عميل من لبنان.. وقطر.. ومصر.. ودول تانية في المنطقة.. ودول مش ناس عاديين.. دول عملاء أصولهم ممكن تتعدى الـ 100 مليون دولار.. وفيه منهم ناس بدأت فعلا تستلم إشعارات بإغلاق حساباتهم.. وبنصيحة إنهم ينقلوا أصولهم لبنوك تانية.
طب ليه كل ده؟
بص يا سيدي .. البنوك الكبيرة زي HSBC.. عليها رقابة دولية مشددة جدا.. خصوصا بعد الفضايح المالية اللي حصلت في السنين اللي فاتت.. واللي كشفت عن تلاعب وغسيل أموال.
الجهات الرقابية.. زي هيئة الرقابة المالية السويسرية.. بتراقب كل كبيرة وصغيرة على البنوك دي.. وأي تقصير في تطبيق معايير "العناية الواجبة" بيعرض البنك لعقوبات قاسية جدا.. والهيئة دي اكتشفت إن HSBC كان عنده بعض القصور في التدقيق على بعض الحسابات الحساسة.. وده خلى البنك ياخد الخطوة الاستباقية دي.. ويقرر إنه ينهي علاقته بالعملاء دول.. عشان يقلل من المخاطر المحتملة.. ويكون متوافق مع القواعد الجديدة.
الواضح كده إن البنوك العالمية.. وخصوصا اللي بتتعامل مع ثروات ضخمة.. بقت أكتر حذرًا.. وموضوع التعامل معاها مبقاش سهل زي زمان.. البنوك دلوقتي بتضحي بأرباحها.. مقابل إنها تحافظ على سمعتها.. وتتجنب أي مشاكل قانونية.. وده بيورينا قد إيه عالم البنوك بيتغير بسرعة.. وبقى أكتر تعقيدًا.. وإيه هي المخاطر اللي ممكن تواجه الأثرياء في تعاملاتهم المالية الدولية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
