يا ترى إزاي التوسع في إنشاء المناطق الحرة الجديدة ممكن يخلي مصر تحقق الهدف الكبير بتاع 140 مليار دولار صادرات لحد 2030؟، وهل فعلا الخطوة دي هتكون هي المعادلة الصعبة اللي نقدر نكسب بيها استثمارات وفرص عمل في نفس الوقت؟
الحكومة أعلنت عن إنشاء 4 مناطق حرة عامة جديدة في العاشر من رمضان وأكتوبر الجديدة وبرج العرب الجديدة والعلمين الجديدة، واللي هتشتغل بشكل كامل على التصدير من غير ما تزاحم السوق المحلي، ودي خطوة بتأكد إن في رؤية واضحة لزيادة موارد مصر من العملة الصعبة.
والميزة هنا، إن المناطق الحرة بتدي للمستثمرين بيئة استثمارية مريحة جدا، من بنية تحتية متطورة لحد تسهيلات جمركية وضريبية، وده اللي يخلي الشركات سواء محلية أو أجنبية تفكر إنها تحط فلوسها في مصر وتستفيد من المزايا دي.
ونقدر نقول إن المناطق الحرة مش مجرد مصانع للتصدير وبس لكنها كمان بتبقى مراكز للخدمات اللوجستية والتجارة يعني بتربط بين أهداف الدولة والمستثمرين، ومع وجود خطة متكاملة فالإنتاج اللي هيطلع من المناطق دي هيبقى كله موجه بره مصر وبالتالي هيزود حجم الصادرات بشكل كبير.
كمان الدولة شغالة بالتوازى على تحسين البنية التحتية سواء في الطرق أو المواني أو خدمات الطاقة، وده بيخلي مصر قادرة تنافس إقليميا ودوليا في جذب الصناعات التصديرية الكبيرة.
ونقدر نقول، ان الهدف الكبير اللي هو 140 مليار دولار صادرات بحلول 2030 مبقاش حلم بعيد لاننا بالفعل شفنا زيادات ملحوظة في الصادرات الفترة اللي فاتت، ومع دخول المناطق الحرة الجديدة حيز التشغيل المتوقع في 2026 فده هيكون نقطة انطلاق ضخمة تدي دفعة قوية للصادرات المصرية.
والأهم ان ده معناه فرص عمل جديدة لآلاف الشباب لأن كل مصنع جديد بيتبني جوه المناطق الحرة محتاج عمالة مدربة وفنيين، وده هيفتح الباب لمستقبل أفضل لأسر كتير.
واللي يهم المواطن العادي هنا، إن زيادة الصادرات معناها دخول عملة صعبة أكتر للبلد وده بيساعد في استقرار الجنيه قدام الدولار وبالتالي هيخف الضغط على الأسعار تدريجيا، يعني التضخم يقل وده ينعكس على جيب الناس بشكل مباشر.
كمان، مع دخول استثمارات أجنبية ومحلية جديدة، فشركات كتير هتتسابق تقدم مرتبات أحسن وحوافز أكبر عشان تجذب العمالة الماهرة وده هيخلق منافسة في السوق المحلي تخلي دخل الموظف والعامل يزيد مع الوقت.
يعني ببساطة، المناطق الحرة مش بس مشروع حكومي لكنها معادلة صعبة بتحقق 3 أهداف في نفس الوقت:ذ وهي زيادة الصادرات وجذب الاستثمارات وتوفير فرص عمل، عشان نقدر نحافظ على نفس الوتيرة لحد 2030 وتحقق المستهدف اللي هو140 مليار جنيه صادرات.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
