قبل جلسة المعارضة على حبسه.. الاعترافات الكاملة لـ إمام عاشور في تعديه على فرد الأمن
الأربعاء 20/نوفمبر/2024 – 09:57 ص
تنظر المحكمة المختصة، بعد قليل جلسة نظر المعارضة الاستئنافية على حكم حبس اللاعب إمام عاشور لاعب الأهلي 6 أشهر، لاعتدائه على فرد أمن بمول بالشيخ زايد.
اعترافات إمام عاشور في واقعة تعديه على فرد أمن مول أركان
وكانت محكمة جنوب الجيزة، قررت حبس إمام عاشور لاعب النادي الأهلي، 6 أشهر، على خلفية اتهامه بالتعدي على فرد أمن بأحد المولات الشهيرة بالشيخ زايد.
وينفرد يلا فور تريندبنشر أقوال إمام عاشور، لاعب النادي الأهلي بالتحقيقات قبل النطق بالحكم في المعارضة الاستئنافية علي حكم حبسه 6 أشهر في واقعة تعديه على فرد أمن مول الشيخ زايد، بعدما منعه من الدخول للمول للتعدي على شباب ضايقوا زوجته داخل المول حينما كانت في طريقها للسينما.
وقال إمام عاشور لاعب النادي الأهلي، في اعترافاته أمام جهات التحقيق: اللي حصل إني كنت في الرحاب في التجمع الخامس مع صاحبي محمود، وجالي تليفون من مراتي بتقولي إن فيه شباب عاکسوها وعايزاني أكلم معاذ أهديه علشان ميعملش مشكلة، وساعتها أنا كلمت عمر أخو مراتي الكبير، وقولتله قول لمعاذ يهدا ميعملش حاجة، ولما تطلعوا من السينما بلغوا مشرفين الأمن باللي حصل ويتحفظوا عليهم لحد ما آجي ونعمل محضر.
وأضاف إمام عاشور: لما وصلت لقيت مراتي قاعدة في العربية، وأخدت معاذ أخوها الصغير ودخلت معاه المول ومشرفين الأمن حاولوا يوقفوني ويقولولي استنى، فأنا دخلت وجم ورايا علشان معاذ قالي إنهم متحفظين عليهم في الباركنيج اللي تحت، ولما نزلت تحت ملقيتش حد وكان فيه زحمة لإن الناس اتلمت لما شافوني، وأنا كنت بقول هما فين هما فين وبزعق لإن مراتي اتعاكست في المول.
إمام عاشور لـ أمن المول: بتصوروني ليه أنا مراتي اتعاكست
وأكمل إمام عاشور في اعترافاته أمام جهات التحقيق: ساعتها مشرفين الأمن قالوا لي أنت بتزعق ليه؟، قولت لهم أنتم المفروض متحفظين على شباب عاكسوا مراتي هما فين، طبعا محدش رد عليا وكذا واحد من مشرفين الأمن طلعوا تليفوناتهم وأنا بتكلم وصوروني، وقولت لهم أنتم بتصوروني ليه، وحصل ازدحام في اللحظة دي وأنا مشتبكتش مع حد فيهم.
إمام عاشور بالتحقيقات: لقيت فرد الأمن واقع.. وحاولت أفوقه
وأردف لاعب النادي الأهلي بالتحقيقات: وأنا بدور وشي لقيت عبد الله، مشرف الأمن المجني عليه، واقع على الأرض، ومشوفتش عبد الله غير وهو واقع علي الأرض وأول ما شفته واقع على الأرض، أنا جريت عليه وقلعته الجزمة وبحاول أفوقه وفاق بعدها على طول، وقولت للناس بعد إذنكم يا جماعة وسعوا علشان الراجل اللي وقع ياخد نفسه، ولما فاق قعد يقولي إنه عنده أسرة وأولاد وعايزك تساعدني والموضوع انتهى، وأخدت بعضي ومشيت والراجل اللي وقع اللي اسمه عبد الله بقي كويس وأخدت مراتي وأهلي وكانوا مستنيين بره مول أركان، وروحنا واتفاجأت لما روحت إن فيه خرابيش في إيدي من الزحمة والزق، ومراتي قالت لي أنت ساكت ليه، متعملش قضية قولت لها أنا مش عايز أضر حد.
س: متى تلقيت الاتصال الهاتفي من زوجتك ياسمين حافظ؟
ج: كلمتني حوالي الساعة 4 صباحًا 2024/6/19.
س: ما الذي قصصته عليك حينها؟
ج: قالت لي إن فيه شباب عاكسوها في أركان، وإن معاذ أخوها عايز يعمل مشكلة وعايزاني أكلمه علشان أهديه.
س: هل أخبرتك بمجريات ما حدث من وقائع قبلها؟
ج: لا هي مراتي مقالتليش اللي حصل بالضبط إن حد عاكسها بس معاذ قالي إن فيه واحد كان لابس جلابية مقالوش لونها ايه.
س: وكيف جرى التعرض لزوجتك تحديدًا؟
ج: أنا معرفش هما بس قالوا لي إن فيه حد عاكسها وأنا حضرت علشان أعرف فيه إيه.
س: صف لنا المتعرضين للمجني عليها ياسمين حافظ زوجتك؟
ج: معاذ قالي إنهم مجموعة شباب واحد منهم لابس جلابية.
س: كيف قابلت ما قصته عليك من وقائع؟
ج: أنا كلمت عمر أخوها الكبير وقولتله يبلغ مشرفين الأمن يتحفظوا على الشباب دي وأنا جاي علشان أعمل محضر.
س: ومتي وصلت تحديدًا لمجمع مقاهي أركان بلازا؟
ج: حوالي الساعة 9 صباحًا بتاريخ 2024/6/19.
س: ومن كان برفقتك حينها؟
ج: كان معايا م.ع.
س: وما الذي أتيته حال وصولك؟
ج: أنا قابلت معاذ وأخذت معاذ معايا ومحمود راح لمراتي يطمن عليها ونزلت الجراج اللي معاذ قالي إنهم متحفظين على الشباب فيه.
اعترافات إمام عاشور
س: وما الذي أبصرته فور وصولك الأماكن انتظار السيارات؟
ج: لقيت زحمة كتير من الجمهور كانوا ماشيين ورايا ساعة ما دخلت أركان، وكنت بسأل على الشباب إنه المفروض الأمن متحفظ عليهم وملقتهومش فسألت بتوع الأمن.
إمام عاشور لـ أفراد الأمن: عايزني أهدى إزاي ومراتي اتعاكست
س: وما الحوار الذي دار بينك وبين مشرفي الأمن حينها؟
ج: كنت بقول هما فين فقالوا لي أهدا أنت بتعلي صوتك ليه، قولتلهم أنتم عايزني أهدا إزاي ومراتي اتعاكست.
س: وما ردة فعل مشرفي الأمن الموجودين بمحل انتظار السيارات؟
ج: كان فيه مشرفين أمن كثير وجمهور كثير وأنا شوفت حوالي 4 بيصوروا كلهم لابسين لبس اليونيفورم بتاع مول أركان، وأنا بلف لقيت حد منهم بيصور قولتله متصورنيش وكان ماشي ورايا بالكاميرا، وحصل تزاحم وعبد الله مشرف الأمن وقع على الأرض لوحده محدش لمسه.
س: ما ظروف تقابلك مع المجني عليه مشرف الأمن عبد الله؟
ج: أنا شوفت عبد الله مشرف الأمن كان مطلع تليفون وكان بيصور قولتله متصورنيش.
س وما مدي وجود تلاحم وتدافع بينكما؟
ج: أنا ملمستوش خالص ومحصلش بيني وبينه أي حاجة غير إني كنت بقوله متصورنيش.
س: وكيف قوبل طلب إيقاف التصوير من المجني عليه؟
ج: هو كمل تصوير وبعد كده حصل ازدحام.
س: وكيف قابلت رفضه وقف التصوير؟
ج: أنا معملتش حاجة أنا لقيت الناس بدأت تتزاحم وتتدافع وساعتها عبد الله وقع.
