تصدرت أخبار عدة محرك البحث خلال الساعات الماضية، ويرصد «يلا فور تريند»
“مروة” وأصحابها بيعيدوا تدوير الجينز القديم لشنط مدرسية ويوزعوها على الأيتام
وفيما يلي التفاصيل:
يتلخص مفهوم الصداقة في الوقوف معاً فى السراء والضراء، ولكن مروة الشريف وأصدقاءها لا يجتمعون فقط في المناسبات السعيدة والحزينة الخاصة بهم، ولكن يجتمعون أيضاً في أعمال الخير، حيث يحرصون على إعادة تدوير البنطلونات الجينز ويحولوها لحقائب مدرسية لتوزع على الأطفال الأيتام.
وتحدثت مروة الشريف، خريجة كلية التجارة، عن فكرة إعادة تدوير البنطلونات الجينز، حيث قالت لـ” يلا فور تريند”:” اتعرفت من فترة على شباب من محافظة القاهرة خلال رحلاتى لأماكن أثرية وعملنا جروب أنا وهم مع صحابى القدام، ووالدة بنت من صحابى كانت بتحول بنطلون لشنطة وكانت بتعملها جميلة جداً، فأصحابى اللى من القاهرة اقترحوا فكرة إننا نستغل البنطلونات القديمة ونحولها لشنطة مدرسية نفرح بيها الأطفال وكمان الشنطة هتكون متينة وسهلة التنظيف، وبما إنى من إسكندرية قدرت أجمع صحابى اللى عايشين معايا في نفس المحافظة”.
وعن تطبيق فكرة إعادة البنطلونات القديمة، قالت مروة :”الفكرة بسيطة و سهلة، إحنا بنجمع البنطلونات الچينز القديمة وبنرسلها لمصنع أو ورشة خياطة لتصميم شنطة مدرسية، والتكلفة بتتراوح مابين 35- 50 جنيها، والتكاليف دى بجمعها أنا مع أصحابى وأسرنا والمعارف بس “.
تحرص مروة وأصدقاؤها على توزيع الحقائب المجانية بأنفسهم لإدخال السرور على الأطفال الأيتام التي ترغب في حقيبة مدرسية مختلفة ومميزة.
وعن مصير الحقائب المدرسية، قالت مروة :” إحنا بنوزع الشنط على الايتام اللي عارفينهم وبنعرف غيرهم عن طريق مشرفة اجتماعية بمدرسة حكومية وبننزل نسأل بنفسنا عن الحالات والمشرفات ذوق معانا وبيقولوا لنا مين اللى يستحق ومين حتى والده موجود بس مريض أو قعيد”.
وعن أمنيتها التي تحلم بتحقيقها، قالت مروة:”نفسي نقدر نساعد أكبر عدد من الأطفال لأن ما شاء الله الفكرة سهلة و تستحق تعب التجميع والتصنيع و التوزيع و إن شاء الله نسمع أن في عدد كتير من الشباب ساعدوا و نفذوا الفكرة”.
