"دعاء وكلمات من القلب".. رسائل دعم قوية من شيكابالا والغندور لـ إبراهيم سعيد

تصدر إبراهيم سعيد نجم الأهلي والزمالك ومنتخب مصر السابق، محركات البحث في الساعات الأخيرة، وذلك عقب ظهوره الأخير في فيديو على صفحته الشخصية "فيس بوك" وذلك بعد خروجه من السجن، وكان هناك دعمن كبير من الرياضيين لإبراهيم سعيد وفي مقدمتهم شيكابالا لاعب الزمالك السابق، ويستعرض موقع تحيا مصر التفاصيل.

إبراهيم سعيد

وكان إبراهيم سعيد قد تعرض للحبس لمدة 4 أشهر في الفترة الماضية بعد رفع شكوى من زوجته الأولى، وتحدث إبراهيم سعيد بأنه قد تعرض لصدمة كبيرة بسبب شهود أولاده ضده.

دعم محمود عبد الرازق شيكابالا

وكتب محمود عبد الرازق شيكابالا على فيسبوك، الكابتن إبراهيم سعيد من أبرز مدافعي جيله، وتاريخه مع الكرة المصرية ما يقدرش حد ينكره، والنهاردة، وهو بيمر بأزمة، مش مقبول نشوف شماتة أو استغلال للموقف للهجوم عليه.

وتابع محمود عبد الرازق شيكابالا، الأصول بتقول نقف جنب اللي محتاج مساندة نفسية، مش نرمي عليه حجارة، وكلنا ممكن نغلط، وكلنا ممكن نعدي بلحظات ضعف.

واختتم محمود عبد الرازق شيكابالا، بدعيله من قلبي إن ربنا يفك كربه، ويطلع من الأزمة أقوى من الأول.

أحمد عادل يوجه رسالة دعم لـ إبراهيم سعيد 

وقال أحمد عادل في رسالته: "إبراهيم سعيد قبل ما يكون لاعب دولي ومثل منتخب مصر، هو راجل وقدها، ودايمًا كان من أفضل اللاعبين في جيله، خاض تجربة الاحتراف الخارجي، ولعب في أكبر أندية مصر زي الأهلي والزمالك والإسماعيلي، وكل الناس كانت بتشهد له بإمكانياته الفنية والبدنية العالية".

وأضاف: "هيما عن قُرب هو راجل جدع، صاحب صاحبه، ودايمًا بار بأهله، وبيساعد الغريب قبل القريب، وبيتعامل مع الناس كلها بذوق واحترام من أجدع اللاعيبة اللي شُفتهم في حياتي داخل وخارج الملعب".

وواصل أحمد عادل دعمه بقوله: "ربنا يفك كربك يا حبيبي، وانت راجل وقدها، وربنا يهون عليك، ويشفي والدتك وأختك اللي ملهمش غيرك، وإن شاء الله ترجع تقف على رجلك من تاني، وتكمل حياتك بخير وسلام".

خالد الغندور يدعم إبراهيم سعيد

كتب خالد الغندور عبر حسابه الرسمي" فيس بوك": قلبي معاك يا ابراهيم يا سعيد، و ربنا يعينك و يصبرك و يحل كل مشاكلك و نصيحتي ليك قرب من ربنا أوي و صلي و استغفر و قول الحمد لله علي كل شيء، وما حدش عارف الخير فين يمكن ده يكون خير ليك انك تقعد مع نفسك و تتغير للأحسن".