لو معاك عربية وبتهلكك بنزين، تعالى أقولك على حل اقتصادي ونضيف، واللي هو هتحول عربيتك تشتغل بالغاز الطبيعي، بس إيه المميزات اللي ممكن تاخدها؟.. وهل الغاز أحسن من البنزين ولا لا.
مشكلة ارتفاع أسعار البنزين بقت مزعجة لكتير من الناس، وده اللي خلى عدد كبير جدا أنه يحول عربيته أنها تشتغل بالغاز الطبيعي، لأنه أرخص وأنضف، بس هل يا ترى عربيتك تنفع تتحول ولا لا؟
إزاي تحول عربيتك؟
بسيطة جدًا، أول حاجة بتروح لأقرب مركز تابع لـ"غازتك" أو "كارجاس" أو أي شركة من الشركات المعتمدة، وبيكشفوا على العربية ويتأكدوا إنها تنفع تتحول، ولو كل حاجة تمام، بيتم تحويل العربية في خلال يوم أو يومين بالكثير.
لو بتفكر تحول عربيتك تشتغل بالغاز الطبيعي، تعالى أقولك خطوات التحويل واحدة واحدة، أول حاجة لازم تروح مركز تحويل معتمد، وهناك هيكشفوا على العربية فنيًا علشان يتأكدوا إن الماتور حالته تسمح يشتغل بالغاز، ولازم كفاءته تكون أكتر من 70%.
أما تاني خطوة، بيحددوا طقم التحويل المناسب وسعة الأسطوانة اللي تنفع لعربيتك، علشان كل حاجة تبقى ماشية صح ومظبوطة، بعد كده، بتسيب العربية في يوم التحويل، وقبل ما يركبوا أي حاجة، بيتأكدوا إن كل الملاحظات اللي كانت في تقرير الفحص اتصلحت واتظبطت.. وبعدين بيبدأوا في الجد.. بيركبوا طقم التحويل، وبيثبتوا أسطوانة الغاز، وبيوصلوا كل الخراطيم والوصلات اللازمة.
طيب كل حاجة بتبقى أمان؟.. كل حاجة بتتركب على حسب المواصفات القياسية، مع مراعاة السلامة المهنية، علشان تحافظ على العربية وتكون آمنة 100%، وبعدها بيشحنوا العربية بالغاز، وبيكشفوا على أي تسريب، وبيتأكدوا إن كل حاجة محكمة ومتربطة كويس، وبعد كده بيظبطوا العربية بأجهزة الضبط الخاصة، علشان الأداء يبقى زي الفل.. طب وآخر حاجة؟.. بيرجعولك العربية بعد ما يجربوها، ويطمنوا إنها شغالة بالغاز تمام... وبيدوك كل الأوراق المهمة زي شهادة الضمان وشهادة المنشأ للمرور وكتيب الصيانة
طيب التكلفة كام؟
التحويل بيبدأ من حوالي 8 لـ 14 ألف جنيه على حسب نوع العربية، لكن الكويس بقى إن الدولة بتوفر تسهيلات كبيرة جدًا، ممكن تقسط المبلغ على 12 لـ 24 شهر من غير فوايد، وكمان في أوقات بيكون في دعم جزئي أو تحويل مجاني ضمن المبادرات.
طب إيه المميزات بتاعت التحويل؟.. أول حاجة التوفير لأن سعر متر الغاز أقل من نص سعر لتر البنزين تقريبًا، يعني لو كنت بتمون بـ1000 جنيه بنزين، مع الغاز ممكن تمون بـ400 أو أقل، ده غير أن الغاز أنضف للبيئة وبيقلل الانبعاثات الضارة وبيحافظ على الهوا النضيف اللي بنتنفسه.
كمان التحويل بيحافظ على عمر الموتور، لأنه بيقلل الرواسب جوه المحرك، وده بيخلي العمر الافتراضي للموتور أطول، ده غير أن الدولة موفّرة محطات تموين غاز في كل المحافظات، وبتزودها كل شوية، ده غير أن الدولة عاملة خطة قوية لتحويل عدد كبير من العربيات للعمل بالغاز، وده ضمن خطة ترشيد الدعم، وتخفيض التلوث، وتحسين جودة الحياة.
يعني باختصار، هتوفر فلوسك.. وحافظت على البيئة، والعربية هتعيش أكتر.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
