لو هتسأل إيه السبب الأساسي في كل المشروعات القومية اللي حصلت دي كلها، وخاصة في عصر الرئيس السيسي، هتلاقي أن الحكومة عملت أكبر شبكة طرق وكباري واللي اتكلفت مليارات الجنيهات.. بس يا ترى إيه حجم الاستثمارات اللي اتعملت خلال السنوات اللي فاتت؟.. وكام ألف كيلو اتعمل في المحاور والطرق وبتكلفة كام؟
على مدار أكتر من 10 سنين، ومصر مهتمة جدا بكل القطاعات الخدمية والاقتصادية، وبشكل خاص قطاع الطرق والكباري، اللي شهد طفرة كبيرة في عصر الرئيس السيسي بعد ثورة 30 يونيو والمتمثل في وزارة النقل والمواصلات، واللي نفذت آلاف المشاريع القومية اللي اتكلفت أكتر من 500 مليار جنيه.
مشروعات الطرق اللي اتعملت دي مش مجرد ربط شبكة طرق وخلاص، لأن كان الهدف منها هي خطط التنمية الاجتماعية والاقتصادية للدولة، وتعزيز فرص التكامل الاقتصادي مع كل الدول المجاورة على طول المحاور الرئيسية بين الشرق والغرب وبين الشمال والجنوب، وده أفضل استغلال لثروات مصر القومية، ده غير كمان أن الهدف منه تعمير مناطق جديدة في الصحراء الغربية وشمال سيناء وخدمة مناطق التنمية الزراعية.
هل الطرق دي بتخدم الناس بس؟
الهدف من شبكة الطرق العملاقة اللي اتعملت، هو زيادة حجم المنقول من البضايع بين مراكز النشاط الاقتصاي المختلفة داخل الجمهورية يعني ربطت مناطق الصناعة والزراعة بمحتوى التجارة من مواني ولوجستيات وكمان فتحت شرايين جديدة للاقتصاد ولولا شبكة الطرق العالمية اللي عملتها مصر واللي بتحتل الترتيب 18 عالميا في جودة الطرق مكانش هيكون فيه مناطق صناعية ولا زراعية جديدة ومكانش هيكون فيه استثمارات خارجية أصلا..
كمان شبكة الطرق خفضت أزمنة الرحلات وده كان ليه مرجود إيجابي في تكلفة التشغيل، ده غير أن كل ده هيوفر 8 مليار دولار كل سنة من الوقود اللي بتتحمله الدولة نتيجة الاختناقات المرورية والحد من الآثار البيئية.
الحكومة عملت كمان طرق جديدة وصلت لـ7000 كيلو وبتكلفة 175 مليار جنيه، و انتهت الدولة من تنفيذ 6300 كيلو منها بتكلفة 155 مليار جنيه، وفاضل 700 كيلو قربت وزارة النقل الانتهاء منهم، ده غير رفع كفاءة 10 آلاف كيلو من شبكة الطرق الموجودة دلوقتي بتكلفة 130 مليار جنيه واللي انتهت من تنفيذ 8400 كيلو منها، بتكلفة 110 مليار جنيه.
الدولة كمان حلت مشكلة الاختناقات المرورية وزودت معدلات السلامة والأمان، بعد ما ألغت التقاطعات السطحية على الطرق، وألغت كمان تقاطعات الطرق مع خطوط السكك الحديدية، وده عن طريق أنها عملت كباري أعلى المزلقانات وكباري علوية للعربيات أعلى الرياحات بدلا للمعديات، ده غير أن الدولة خططت لإنشاء 1000 كوبري ونفق بتكلفة 140 مليار جنيه، عشان يكون الإجمالي 2500 كوبري ونفق.
الخلاصة.. أن إنجازات الدولة في شبكة الطرق والكباري لا تعد ولا تحصى، ده غير أن التقنيات والمعدات الحديثة اللي عملت الطرق دي، دخلت الخدمة في عهد الرئيس السيسي وبتوجيهات شخصية منه، وده عشان أهميتها الكبيرة في الحفاظ على الطفرة غير المسبوقة في تطوير شبكة الطرق.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
