لو ناوي تشتري عربية دلوقتي، يبقى لازم تاخد بالك من حاجات مهمة جدا وأنت بتحط شقى عمرك فيها، وده يخليك تحط كام سؤال في دماغك وأنت بتشتري، زي مثلا، العربية دي ماشية كام كيلو؟.. وإزاي تخلي بالك من العمر الافتراضي للماتور؟.. طب الزيرو أفضل ولا المستعمل؟
إزاي تشتري عربية من غير ما حد يغشك؟.. سؤال بيدور في دماغ كل واحد ناوي يشتري عربية جديدة أو مستعملة، ولكن رغم اتفاع الأسعار بيتجه أغلب الناس لشراء عربية مستعملة، لكن بينخدع كتير مننا في الشكل الخارجي للعربية، وده اللي بيخليهم مش مهتمين بسلامة الأساسيات الداخلية للعربية، وده بيوقعهم في مشاكل كتير جدا بعد ما يشتروا العربية.
إزاي تتأكد أن العربية دي سليمة؟
أهم حاجة وأنت بتشتري العربية لازم تركز أوي في العداد بتاعها، لأن ممكن تتخدع فيه بسهولة، ولازم تحدد الأساسيات اللي ممكن تشتري العربية دي عشانها، ونصيحة مهمة أنك تبعد عن لهفة الشراء المبالغ فيها.
وأنت بتشتري عربية، مهم جدا أنك تبص على شاسية العربية، والموتور والفتيس والعفشة، لأن ده بيظهر العربية على حقيقتها، وجه هيأكدلك أذا كانت حالتها كويسة ولا لا.. بس ده كله مش كفاية.. ده لازم كمان تكشف على العربية بجهاز الحاسب الآلي عشان تقدر تكشف حقيقة العداد، لأن احتمال كبير ممكن تلاقي فيه تلاعب هيخسرك كتير بعد الشراء.
طب إيه النصايح المهمة اللي لازم تخلي بالك وأنت بتشتري؟
أول حاجة لازم تحدد الميزانية بتاعتك اللي هتشتري بيها، وتفحص العربية بشكل كامل في مركز صيانة معتمد، ده غير أنك لازم تفحص العربية بنفسك مرة، ومرة تانية يكون معاك ميكانيكي تكون بتثق فيه جدا.
كمان وأنت بتشتري، لازم تخلي بالك من سجلات الصيانة وتاريخ الحوادث عشان تتأكد أن العربية مفيهاش مشاكل مخفية هتخسرك كل فلوسك.. ومتتكسفش وأنت بتتفاوض في سعر العربية عشان توصل لأفضل سعر ليك، كمان لازم تتأكد من وجود جميع المستندات القانونية قبل ما تدفع جنيه واحد.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
