سيناريوهات محتملة حطتها الحكومة المصرية، بعد تصاعد التوترات واندلاع الحرب الإيرانية الإسرائيلية، وده اللي خلاها تشكل "لجنة الأزمات" لأن شغلها الشاغل هو المواطن المصري، بس يا ترى اللجنة عملت إيه قبل وقف إطلاق النار بين إيران وإسرائيل؟.. وإزاي الحكومة اتعاملت مع حالة الفوضى الإقليمية؟.
من الدقيقة الأولى لتصاعد التوترات الإقليمية وخاصةً مع اندلاع حرب إيران وإسرائيل، مصر اتحركت بسرعة جدا عشان تحمي شعبها بكل قوتها، وعملت لجنة الأزمات للتعامل مع أي تداعيات ممكن تحصل من الحرب دي، واللي كانت ممكن يكون لها آثار أمنية واقتصادية وإنسانية مباشرة أو غير مباشرة على مصر.
بس النهاردة ومع الهدنة اللي حصلت بين إيران وإسرائيل، طلع الدكتور مصطفى مدبولي، رئيس مجلس الوزراء، وكشف كل حاجة تخص لجنة الأزمات، ونبه أن الدولة اتحركت على مدار الساعة من بداية الأزمة الإيرانية الإسرائيلة، وشكلت لجنة الأزمات لمتابعة الموقف ومراجعة جميع السلع الاستراتيجية مع الغرف التجارية والصناعية بالتعاون مع البنك المركزي.
معنى إيه اللي عملته الحكومة المصرية؟
اللجنة اللي عملتها الحكومة، كانت الأولوية ليها، هي ضمان استمرار حركة الاقتصاد ومنظومة الإنتاج، وضمان وجود مستلزمات الإنتاج والمواد الخام، مش بس وكده، ده كان دورها عدم توقف أي مصنع، واستمرار الطاقة الإنتاجية القصوى لجميع المصانع، لأن ده هيساهم في تأمين السوق المحلية وعدم حدوث أي أزمات أو زيادة في الأسعار.
طيب الحكومة اتصرفت إزاي؟
رئيس الوزراء اجتمع مع الحكومة في العلمين الجديدة، واللي شرح فيها أنه من اللحظة الأولى الحكومة وضعت مجموعة من السيناريوهات بما فيها السيناريو الأسوأ، كمان كانوا حريصين جدا أنهم يسمعوا جميع آراء الخبراء ده غير اللجان الاستشارية.
رئيس الوزراء قال إن لقائه مع لجنة الشئون السياسية كانت مهمة جدا، لأنه كان بيستشيرهم في كل كبيرة وصغيرة، في الوقت اللي شغال فيه الصراع بين إيران وإسرائيل، وقدرنا أننا نعدي من المرحلة الصعبة دي، وده لما كل قطاعات الدولة اشتغلوا مع بعض.
ويا ترى البنك المركزي كان دوره إيه؟
رئيس الوزراء قال إنه نسق مع البنك المركزي وقت تشكيل لجنة الأزمات، وده عشان تستقر الأسعار وميحصلش أي زيادة، كمان الحكومة كان شغلها الشاغل هو توفير الأدوية، ده غير متابعة الحكومة مع وزير البترول لحظة بلحظة عشان دخول دخول سفن التغييز في أسرع وقت ممكن، لحد ما تدخل السفينتين في شهر يوليو الجاي لتأمين احتياجات مصر بالكامل، وده حل مؤقت لحين استعادة طاقتنا الإنتاجية بالكامل للغاز الطبيعي، عشان إمدادات الغاز وتوفير الكهربا.
الخلاصة.. أن مصر عملت لجنة الأزمات دي عشان تحمي المواطن المصري من أي أزمة، وكان نجاحها مرهون بمدى جاهزيتها، وده تم بالتنسيق مع كل مؤسسات الدولة وشفافية التواصل مع المواطنين في مهمة خاصة لا تقبل الفشل..، وده ساعد على ضمان أمن واستقرار الدولة والمجتمع.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
