يا ترى ليه صندوق النقد فجأة توقعاته لمعدل نمو الاقتصاد المصري لـ3.8%، القرار ده معناه إيه، وإزاي ده ينعكس على حياتك كمواطن؟، وهل فعلا في بوادر تحسن ولا لسه بدري؟.
صندوق النقد الدولي، وبشكل مفاجئ شوية، أعلن إنه رفع توقعاته لمعدل نمو الاقتصاد المصري للسنة المالية 2024/2025 لـ 3.8%، بدل ما كانت توقعاته أقل من كده بكتير.
والسبب هو، إن في مؤشرات إيجابية ظهرت في النصف الأول من السنة ذي 2024، حاجات زي زيادة في استثمارات القطاع الخاص، وتحسن في بعض القطاعات التصديرية والسياحة، وكمان بداية استقرار نسبي في سوق الصرف بعد فترة صعبة.
طيب.. الكلام ده معناه إيه؟
بص يا سيدي، الكلام ده معناه إن الاقتصاد بدأ يتنفس شوية، وبقى فيه نوع من التعافي التدريجي، والخبر المفرح هنا إن نسبة استثمارات القطاع الخاص ارتفعت جدا، ووصلت لـ60% من إجمالي الاستثمار، بعد ما كانت 38.5% بس، وده معناه إن المستثمرين بدأوا يحسوا بثقة شوية، وده مؤشر مهم جدا.
لكن على الناحية التانية، ما نقدرش نتجاهل إن التضخم لسه مرتفع، كان 13.9% في أبريل، يعني الأسعار لسه بتغلي، حتى لو بنسب أقل من قبل كده، بس الاتجاه نازل، ودي نقطة إيجابية.
طيب، أنا كمواطن هستفيد من ده إيه؟ وإمتى؟
بصراحة، التحسن ده لسه في بدايته، ولسه ما وصلش جيب المواطن، بس لو الاتجاه ده استمر، هنبدأ نشوف استقرار أكتر في الأسعار، وفرص عمل جديدة، وكمان مشاريع استثمارية بتتفتح، وينكن حتى تحسن في الخدمات العامة.
بس الشرط الأساسي إن الحكومة تكمل الإصلاحات اللي بدأتها، زي تقليل دور الدولة في الاقتصاد، وتسهيل دخول القطاع الخاص، وتحسين مناخ الاستثمار، زي ما صندوق النقد قال إن مصر محتاجة تكمل المشوار، وتشتغل على تقوية القطاع الخاص، وتحسين بيئة الأعمال، وكمان تقليل الدَّين العام وتكلفته.
يعني باختصار إحنا في مرحلة انتقالية، فيها بوادر أمل، بس لسه الطريق طويل شوية، يعني التحسن ممكن يحصل بس محتاج استمرار في الشغل وتنفيذ حقيقي للإصلاحات وكمان شفافية.
وطبعا كل الكلام ده الحكومة المصرية بتنفذه بحزافيره، وظهرت بوادر الإصلاح الاقتصادي وانفتاح السوق المصري وإفساح المجال أكتر للقطاع الخاص ده غير الطروحات الحكومية ودخول شركات تبع الحكومة للبورصة، وكل ده بيأكد إننا ماشين صح وإن الوصول للنقطة الأخيرة في طريق الإصلاح الاقتصادي الشامل والتنمية المستدامة قرب جدا.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
