تحدث الإعلامي أحمد شوبير، عن تفاصيل الساعات الأخيرة، للإسباني خوسيه ريبيرو في تدريب الأهلي، قبل قرار إقالته.
تصريحات أحمد شوبير
قال أحمد شوبير: “ريبيرو ودع الجميع امبارح في الأهلي، ولسه قاعد في مصر يوم كده لحد ما يسافر بالسلامة إن شاء الله، سواء لإسبانيا أو جنوب إفريقيا أو أي مكان، ربنا ييسر الحال”.
وتابع عبر راديو أون: “أنا بقى من ساعة ما قالوا آخر يوم قبل ما الأهلي يديله الشرط الجزائي والثلاث شهور، أنا قلت، لأ أنا مش مرتاح للقصة دي”.
وواصل: “أنا مش مقتنع بقصه أن مفيش شرط جزائي معنديش قناعات، إزاي يعني، أنا راجل مدرب ماضي عقد، إزاي يتقال لحد أول ثلاث شهور مفيش شرط جزائي”.
وأكمل: ده في واحد راميها كده لهدف معين، والأخبار دي لما بتتكشف إنها خاطئة بيبقى مردودها أسوأ، إيه عايز تعدي ترعة، تقع في محيط، فملهاش لازمة".
الشرط الجزائي في عقد ريبيرو
وزاد: “مفيش أحسن من الصدق، الصدق كنز لا يفنى، زي القناعة برضه كنز لا يفنى، متخفش، قول الصدق، إيه المشكلة يعني”.
وأشار: “معلوماتي اللي قلتها امبارح، إنه سألته بالنسبة لنهاية العقد، فقال المحامين يخلصوها مع بعض، والراجل ليه شرط جزائي”.
وأكد: “وبيحصل تفاوض على الشرط الجزائي، ممكن الدفع مثلا يعني بدل ثلاث شهور يبقى شهر ونص مثلًا، وارد يعني، التفاوض لازم ياخد حقه وتمام التمام ويخلص”.
وذكر: “لكن تقولي أصل آخر يوم، وإذا الأهلي ما أخدش قرار النهاردة، إنت بتبرر إيه، بتعمل إيه، خلاص في قرار للمجلس، في قناعات، في رأي عام يبقى خلاص”.
وأتم أحمد شوبير حديثه: "لكنه أسلوب "بلدي" كده وسخيف، ولا يليق باللي بيطلعه، مش حلو ومعجبنيش، قصة مفيش شرط جزائي دي معتقدش، إن لها أساس من الصحة".
