أكد الإعلامي أحمد موسى أن إثيوبيا لا تتحكم في مياه النيل، مشيرا إلى أن تصريحات رئيس الوزراء الإثيوبي بشأن التحكم في المياه أمر غير حقيقي.
وقال موسى خلال برنامج "على مسؤوليتي" المذاع على قناة "صدى البلد": "أبي أحمد قال إنه هيتم التحكم في الميه، وقال إن إثيوبيا أصبحت تتحكم في مياه نهر النيل طبعًا هذا أمر غير حقيقي والنقطة الثانية اللي قالها، إنه هيبدأ في بناء سدود جديدة على غرار هذا السد، وده أمر من المستحيلات".
وأضاف: "ابتدى يتكلم وقال إنهم من سنوات عايزين يبنوا هذا السد، وقعد يتكلم في موضوع سد الخراب الإثيوبي هذا السد لا هيعمل تنمية ولا هيعمل أي حاجة لإثيوبيا، ولكنه سد هدفه سياسي فقط، مالوش علاقة بالتنمية في آخر حدودك مع السودان هتطلع كهربا، هتوديها فين وهتعمل إيه؟ اللي عايز يعمل سد يعمله في منطقة تفيد إثيوبيا بالكامل، لكن ده موضوع سياسي بحت".
وتابع: "وزي ما قلنا قبل كده وبنقولها مليون مرة هذا السد لم يكن ليقام لولا ما حدث في خراب 2011 لو ما كانش في 2011، ما كانش في سد إثيوبي اللي حصل في 2011 هو اللي جاب السد الإثيوبي ده الواقع ما حصلش قبل كده أي خطوة حقيقية، ولا حتى حجر أساس كانوا بيفكروا بس، وما قدروش".
وواصل: "عملوها إمتى؟ 3 أبريل 2011، لما زيناوي حط حجر الأساس محمد مرسي وقتها عمل مؤتمر وقال هنروح وهنعمل، وبعت هشام قنديل والناس اللي عنده يتفاوضوا مع إثيوبيا والسد شغال ومرسي موجود وطلع الاجتماع الفضيحة اللي كان على الهواء وقالوا الحقوا.. ده احنا بنتكلم على الهوا مش سر ده كان وقت حكم جماعة الإخوان الإرهابية، واللي حصل وقتها هو اللي وصلنا للي إحنا فيه النهاردة".
وواصل: "الموضوع كله بدأ من بلد ضعفت وحصل فيها فوضى وكل ما يبقى في فوضى تحصل كارثة زي دي لكن ده مش هيحصل تاني سيادة الرئيس النهارده في خطابه طمّن الشعب المصري، وأكد إن الدولة عارفة اللي بيحصل حوالينا والتهديدات ضد مصر والمنطقة الرسالة كانت واضحة إنها رسالة طمأنة للمصريين".
