أغنى راجل في العالم.. ممكن يبقى أول تريليونير في التاريخ.. بس مش بالحظ، ولا بالميراث، إنما بخطة جريئة من تسلا.
شركة السيارات الكهربائية العملاقة بتعرض على إيلون ماسك حزمة تعويضات خرافية.. قيمتها تريليون دولار، أيوه، تريليون… مش مليون ولا مليار.
طب إيه الأسباب؟.. وإزاي هيحقق ده؟. شركة تسلا الأميركية أعلنت عن عرض جديد لماسك:
لو حقق شوية أهداف ضخمة، هيقدر ياخد تعويضات توصل لـ تريليون دولار على مدار 10 سنين.
أهم شرط؟.. يرفع القيمة السوقية لتسلا من 1.1 تريليون دلوقتي لـ 8.5 تريليون دولار.
يعني محتاج يخلي تسلا أغلى من كل شركات العالم تقريبًا.
وفي المقابل، ماسك هيحصل على أسهم إضافية، هتخلّي حصته في الشركة توصل لـ 25٪ على الأقل، بعد ما كانت حوالي 13٪ بس.
وده مش مجرد رقم، ده معناه إن ماسك ممكن يبقى صاحب القرار الأول والأخير جوه تسلا!"
بس الحكاية مش فلوس وخلاص .. علشان ياخد الحزمة دي، ماسك لازم يحقق أهداف كبيرة جدًا، زي:
• إطلاق مليون سيارة روبوتاكسي ذاتية القيادة
• تصنيع مليون روبوت ذكاء اصطناعي
• والمشاركة في خطة خلافته في إدارة الشركة
• غير كده، عليه يفضل رئيس تنفيذي لتسلا لمدة 10 سنين كمان
يعني مجلس الإدارة مش بيكافئه على اللي عمله.. هو بيقوله: لو عايز التريليون، خليك معانا للنهاية!"
الخطة دي جاية في وقت حساس جدًا، أسهم تسلا نازلة 16% من بداية السنة، وماسك بيدير 5 شركات تانية غير تسلا، زي: سبيس إكس، وX، وشركة نيورالينك (Neuralink) بتاعة الذكاء الاصطناعي، و بورنج كومباني (The Boring Company) المتخصصة في الأنفاق والبنية التحتية.
تسلا خايفة يضيع تركيزه، خصوصًا بعد ما قال صراحة إنه عايز حصة 25% أو هيمشي!
ومع إن محكمة ديلاوير كانت رفضت خطة تعويض سابقة سنة 2018، تسلا دلوقتي بتحاول تكسب تأييد المساهمين قبل التصويت في 6 نوفمبر.
الواضح إن تسلا بترهن على ماسك مش بس كمدير تنفيذي لكن كرمز، كقائد، وكشخص ممكن ياخد الشركة لمستوى خيالي.
بس السؤال: هل ماسك يقدر يحقق الأرقام المجنونة دي؟..ولا الحلم أكبر حتى من أغنى راجل في العالم؟.. شاركنا رأيك في التعليقات وقولنا تفتكر هل يستحق التريليون؟
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
