الدولار العملة الأقوى في العالم نزلت لأدنى مستوياتها من شهر يوليو اللي فات.. والعملة الأمريكية بتعيش أصعب ايامها وكل يوم بتتراجع بشكل واضح .. فيا ترى ايه أسباب اللى بيحصل ده ؟ هل ده معناه إن عصر الدولار بينتهي؟ وإيه اللي بيحصل في كواليس الاقتصاد العالمي.. واللي بيضغط على أقوى عملة في الدنيا؟
اللى كتابع اللى بيحصل في سوق العملات الأجنبية عالميا هيعرف انه من فترة قريبة.. كان الدولار بيطير.. لإن الفيدرالي الأمريكي كان بيرفع الفايدة بشكل مستمر.. علشان يحارب التضخم.
لكن دلوقتي.. الأوضاع اتغيرت.. التوقعات بتقول إن الفيدرالي خلاص.. خلص مهمته في محاربة التضخم.. ودلوقتي دوره هو إنه يحفز النمو الاقتصادي.
حد ممكن يسأل ويقول .. إيه اللي بيضغط على الدولار دلوقتي؟
أول وأهم سبب.. هو توقعات خفض الفايدة.. المستثمرين عارفين إن خفض الفايدة بيخلي الدولار أقل جاذبية.. لإن العائد على الاستثمار فيه بيقل.. وده بيدفعهم إنهم يبيعوا الدولار.. ويتجهوا لعملات تانية.. أو لأصول زي الدهب.
السبب التاني.. هو المؤشرات الاقتصادية.. لو البيانات الاقتصادية الأمريكية طلعت أضعف من المتوقع.. ده هيأكد إن الاقتصاد بيتباطأ.. وإن الفيدرالي مضطر يخفض الفايدة علشان ينعشه.. وده في النهاية بيضغط على الدولار.
كمان.. فيه عوامل تانية.. زي التوترات السياسية العالمية.. لو التوترات دي بتخف.. المستثمرين بيقللوا من حيازتهم للدولار.. لإنهم مش محتاجين الملاذ الآمن ده.
فلحد دلوقتي كل المؤشرات بتقول إن الدولار في مرحلة ضعف مؤقت.. بسبب توقعات خفض الفايدة.. والقرار اللي جاي للفيدرالي.. مش بس هيأثر على سعر الدولار.. لأ.. ده هيأثر كمان على أسعار الدهب.. وعلى العملات التانية.. وحتى على تكلفة الديون على الدول اللي ديونها بالدولار.
الموضوع ده كله.. بيخلي اجتماع الفيدرالي اللي جاي.. هو أهم حدث اقتصادي في الفترة دي.. لإن قراره هيحدد مصير الدولار.. ومستقبل الاقتصاد العالمي كله.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
