أسعار اللحوم.. عاملة أزمة بين الجزارين والفلاحين، وكل يوم حد يتكلم والتاني يرد عليه حولين السعر العادل للكيلو.
شلبي جابر، عضو شعبة القصابين بغرفة القاهرة، هاجم كلام نقيب الفلاحين حسين عبدالرحمن أبو صدام، اللي قال إن السعر العادل لكيلو اللحمة الحمراء يتراوح ما بين 280 لـ300 جنيه.
جابر وصف كلام نقيب الفلاحين وقال دي "أسعار الزمن الجميل" ومش واقعية في الظروف الحالية.
وقال إن كيلو اللحوم البقري الحي بيتراوح من 170 لـ185 جنيه، وإن الكيلو بعد الذبح في المجازر بيوصل لـ300 جنيه.
جابر قال كمان إن الأسعار اللي بتنتشر أحيانًا على السوشيال ميديا زي 160 أو 200 جنيه مش حقيقية ومجرد عروض فردية، وإن الأسعار الحقيقية في السوق أكتر من 300 جنيه.
وأن انخفاض أسعار الدولار ملوش علاقة باللحمة البلدى، ولكن ممكن يأثر على اللحوم المستوردة.
في الناحية التانية، أبو صدام مصر على إن أسعار اللحوم الحية بالفعل في تراجع، والجاموسي بيتراوح ما بين 140 لـ145 جنيه للكيلو القائم، والبقري من 160 لـ165 جنيه.
وقال إن السعر العادل بعد الذبح لازم يفضل في حدود 280–300 جنيه، عشان يحمي المستهلك من المغالاة، وفي نفس الوقت يضمن للتاجر هامش ربح معقول.
وبين شد وجذب بين الفلاحين والجزارين.. المستهلك واقف في النص.. بيدوّر على سعر يحافظ له على قوته الشرائية من غير استغلال.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
